Qazaqstanda turyp jatqan ázerbaijan diasporasynan shyqqan kásipkerlerdi bopsalamaq bolǵan urylar áleminiń serkesi ustaldy. Bul týraly QR IIM Memlekettik til jáne aqparat departamentiniń direktory Almas Sadýbaev málim etti, dep habarlaidy QazAqparat tilshisi.
«QR IIM, UQK jáne Aqmola oblystyq IID qyzmetkerleri Shýchinsk qalasyndaǵy qonaq úilerdiń birininiń nómerinen Grýziia men Ázerbaijan aýmaǵynda qylmystyq is-áreketpen ainalysqan, ózin «vor v zakone» kastasyna qatysty sanaityn Ázerbaijan Respýblikasynyń azamatyn qolǵa túsirdi. Ustalǵan adamnan oǵy bar tapansha, granata jáne esirtki zattary tárkilendi», - dedi ol.
Departament basshysynyń aitýynsha, kúdikti Qazaqstanǵa Tbilisiden áýe reisimen kelgen.
«Aldyn ala málimetterge sáikes, ol týǵan-týysy Grýziia men Ázerbaijan Respýblikasynda turatyn ázerbaijan diasporasynan shyqqan kásipkerlerdi bopsalaýmen ainalysýdy josparlaǵan. Ustalǵan adam ýaqytsha oqshaýlaǵyshqa qamaldy. Tergeý amaldary júrgizilip jatyr», - dedi Almas Sadýbaev.
