Qazaqstanda avtordan ádebietterdi belgili bir merzimge satyp alý tártibi engiziledi. Bul týraly Senattyń jalpy otyrysynda QR Mádeniet jáne sport ministri Aqtoty Raiymqulova aitty, dep habarlaidy "Ult aqparat".
«2017 jyly depýtattyq korpýstyń arqasynda alǵash ret zańnamalyq deńgeide avtorlarǵa qoǵamdyq mańyzy bar ádebiet úshin qalamaqy tóleý tájiribesi engizildi. Bul basqa elderde bolmaǵan jaǵdai. Alaida, is júzinde yńǵaisyz qaishylyqtar paida boldy. Atap aitqanda, avtordan ádebietterdi satyp alý avtorlyq quqyqtyń barlyq merzimine memleketke avtorlyq quqyqty berýdi kózdeidi. Ol avtordyń ómir súrgen kezindegi merzim jáne odan keiingi 70 jyl. Bul turǵyda memleket ádebietti ony memlekettik kitaphanalarǵa óteýsiz negizde taratý úshin ǵana satyp alatynyn aita ketken jón», - dedi «Qazaqstan Respýblikasynyń keibir zańnamalyq aktilerine mádeniet máseleleri boiynsha ózgerister men tolyqtyrýlar engizý týraly» QR Zańynyń jobasy jóninde baiandama jasaǵan ministr.
Onyń aitýynsha, óz kezeginde avtordyń qaita shyǵarýǵa nemese kitap dúkenderine satýǵa nemese ony basqa joldar arqyly satýǵa quqy joq.
«Bul jaǵdaida memlekettiń halyqqa mádeni ónimniń qoljetimdiligin qamtamasyz etý jónindegi mindeti oryndalmaidy, kerisinshe shektelip otyr. Osyǵan orai, jobada elimizdiń kitaphanalaryna ádebietti basyp shyǵarý jáne taratý maqsatynda avtordan ádebietterdi belgili bir merzimge satyp alý qarastyrylyp otyr. Odan ári, avtor ony basyp shyǵarýǵa jáne Qazaqstan Respýblikasynyń zańdarymen tyiym salynbaǵan kez kelgen basqa joldarmen taratýǵa quqyly bolady», - dedi Aqtoty Raiymqulova.
