Qazaqstanda avtomobil óndirisiniń kólemi 200 mlrd teńgege jýyqtady, dep habarlaidy "Ult aqparat" energyprom.kz-ke silteme jasap.
«Osy jyldyń 8 aiynda otandyq avtomobil qurastyrý 1,5 ese artyp, 32,3 myń birlikke jetti. 2019 jyldyń qańtar-tamyzynda Qazaqstanda treiler men jartylai tirkemelerdi qosa alǵanda 28,6 myń avtokólik quralyn qurastyrdy. Bul ótken jyldyń sáikes kezeńimen salystyrǵanda 47 paiyzǵa kóp. Onyń 25,6 myń jeńil, 1,7 myńy júk jáne 780-i avtobýstar. Jeńil avtomobilder sanynyń artýyna qaramastan olardyń bir jyldaǵy menshikti salmaǵy 93,5 paiyzdan 89,4 paiyzǵa qysqardy», - delingen taratylǵan aqparatta.
2018 jyly 32,3 myń avtokólik qurastyrylsa, onyń 30 myńyn nemese 92,9 paiyzyn jeńil kólikter quraǵan.
Al biyl qazaqstandyq avtozaýyttar ortasha eseppen aiyna 3,6 myńǵa jýyq kólik qurastyryp jatyr. Bul olarǵa 2019 jyldyń qorytyndysynda shamamen 43 myń avtomobil shyǵarýǵa múmkindik beredi.
Aita keterligi, biyl sáýirde 4 048, mamyrda 4 051 jáne shildede 4 064 avtokólik qurastyrylǵan bolatyn.
«AziiaAvto» men «SaryarqaAvtoónerkásip» kásiporyndary elimizde shyǵarylǵan treiler men jartylai tirkemelerdi qosa alǵan barlyq avtokólik quraldarynyń 91,6 paiyzyn qurastyrǵan. «SaryarqaAvtoónerkásip» bir jyldyń ishinde óndirisin eki esege jýyq arttyryp, 13,1 myń avtomobil qurastyrdy. Onyń 12,3 myńy - jeńil kólik. 2019 jyldyń qańtar-tamyzynda avtokólik quraldary, treiler men jartylai tirkemeler óndirisiniń kólemi bir jyldyń ishinde 117,8 milliardtan 197,9 mlrd teńge jetti.
Kólemniń jartysynan kóbi «SaryarqaAvtoónerkásip» avtozaýyty ornalasqan Qostanai oblysyna tiesili: 100,3 mlrd teńge, 1 jyldaǵy ósim 2,2 ese. Jalpy kólemniń shamamen 42 paiyzy «AziiaAvto», «SemAZ» jáne DaewooBus avtozaýyttary bar Shyǵys Qazaqstan oblysynda: 82,8 mlrd teńge. Onyń 69,2 mlrd teńgesi «Aziia Avto» zaýytynyń enshisinde. Al Aqmola oblysynda ornalasqan «KamazInjiniring» 8,7 mlrd teńgeniń ónimin shyǵarǵan.
