Foto: ulysmedia.kz
Munai-gaz salasynyń sarapshysy jáne Energetika ministrliginiń burynǵy qoǵamdyq keńes múshesi Oljas Baidildinov Astana men Almatydaǵy qoǵamdyq kólikte jol aqysy 500 teńge bolýy kerek dep málimdedi, dep habarlaidy Ult.kz Ulysmedia.kz-ke silteme jasap.
Baidildinovtyń aitýynsha, kólik kompaniialary shyǵynmen jumys istep otyr, al qazirgi tarifter olardyń shyǵynyn jappaidy. Mysaly, Petropavlda qoǵamdyq kóliktegi shyǵynsyz jol aqysy 345 teńge bolsa, jolaýshylar qazir qolma-qolsyz tólemmen 100 teńge, qolma-qol tólemmen 170 teńge tóleidi.
– Men bul týraly burynnan aityp kelemin: bul saladaǵy memlekettik sýbsidiialar — ashyq emes, jemqorlyqqa beiim jáne paidalanýshylar úshin sapa ákelmeidi. Astana men Almatyda jol aqysy 500 teńge bolýǵa tiis (máslihat sessiialarynda buǵan deiin 450 teńge kólemi atalǵan). Tek Almatynyń ózinde byltyr avtobýs tasymaldaryn sýbsidiialaýǵa shamamen 200 mln dollar bólindi. Al siz soǵan laiyq qyzmet sapasyn kórip otyrsyz ba?, – dep jazdy Baidildinov.
Onyń pikirinshe, jolaýshylar jol aqysyn júrgen qashyqtyǵyna qarai tóleýi kerek.
– 3 aialdama ǵana júretin adamnyń, sońǵy aialdamaǵa deiin 1,5 saǵat jol júretin jolaýshymen birdei aqy tóleýinde eshqandai ekonomikalyq nemese logikalyq negiz joq. Avtoparkterge beriletin naryqqa sai emes, ashyq emes sýbsidiialardy alyp tastap, baǵany naryqqa jiberýdi usynamyn. Erte me, kesh pe báribir soǵan kelemiz, – dedi ol.
Eske salaiyq, 2022 jylǵy qańtar oqiǵasy kezinde Baidildinov suiytylǵan gaz baǵasynyń ósýi týraly pikirinen keiin jurt nazaryna ilikken edi. Sol kezde ol «baǵa qymbattady dep narazy bolǵandar qoǵamdyq kólikke minsin» dep, litrine 15-20 teńgege artqan baǵany «bolmashy soma» dep ataǵan, sebebi «internetke odan da kóp tóleimiz» degen edi.
