Qazaqstan Aýǵanstan jastaryna bólinetin bilim granttaryn qysqartady, dep habarlaidy QazAqparat tilshisi.
Bul týraly QR Parlamenti Senatynyń depýtaty Dariǵa Nazarbaeva Astanada ótip jatqan «Aýǵanstandaǵy áielderdiń quqyqtary men múmkindikterin keńeitý» óńirlik konferentsiiasynda málimdedi.
«Aýǵanstan jastaryna arnalǵan 5 jyldyq bilim berý baǵdarlamasy aiasynda myńnan astam aýǵan jastary Qazaqstanda oqydy. Jyl saiyn 100 adam elimizdegi joǵary oqý oryndaryna túsip otyrdy. Qazir bul baǵdarlama óz máresine jetti jáne baǵdarlamany 30 aýǵanstandyqty oqytýǵa deiin qysqartamyz», - dedi Dariǵa Nazarbaeva jýrnalisterge bergen suhbatynda.
Senatordyń aitýynsha, bul bilim alǵysy keletin aýǵan jastarynyń sanyna esh áser etpeýi tiis, sebebi olar Qazaqstanda ǵana emes, Ózbekstan, Japoniia, Eýropada bilim ala alady.
«Búgingi konferentsiiada ózbekstandyq áriptesterimiz óz elderinde aýǵan jastaryn oqytyp jatqanyn aitty. Japoniia da bilim berý jobalarynda Aýǵanstanǵa úlken kómek berip otyr. Eýropalyq odaq bilim berý grantynyń alǵashqy kezeńine 2 mln eýro bólýge daiyn. Iaǵni bul jumys jalǵasa beredi», - dedi Dariǵa Nazarbaeva.
