2019 jyly Qazaqstanda áýe biletteriniń quny arzandaýy múmkin. Bul týraly Investitsiialar jáne damý ministrligi málim etti, dep habarlaidy QazAqparat tilshisi.
Atap aitqanda, búgin Parlament Májilisindegi Úkimet saǵatynda depýtattar áýe biletteri baǵasynyń joǵary bolýy týrizmdi damytýǵa kedergi bolyp otyrǵandyǵyn atap ótti.
Óz kezeginde QR Investitsiialar jáne damý vitse-ministri Timýr Toqtabaev bul baǵytta ministrlik tiisti jumystardy atqaryp jatqanyn aitty.
«Bizde balalarǵa, zeinetkerlerge, múmkindigi shekteýli jandarǵa, jastarǵa arnalǵan jeńildikter eskerilgen jolaýshylardy tasymaldaý erejeleri bekitilgen. Degenmen de, tasymaldaý qunyna qatysty másele áli de bar. Qazirgi kezde Energetika ministrligimen birlese bizdiń ushaqtar parki úshin ózimizdiń aviakerosinmen qamtamasyz etý bóliginde tiisti jumystar júrgizilýde. Aldaǵy jyly tolyqtai otandyq aviakerosinmen qamtý josparlanyp otyr. Meniń oiymsha, kelesi jyly ońtaily nátije baiqalady», - T. Toqtabaev.
Onyń atap ótýinshe, bilet quny birneshe indikatorlar esebinen qalyptasady. Sonyń ishinde aviaotyn baǵasy negizgi kórsetkish bolyp otyr.
Budan buryn habarlanǵandai, Parlament Májilisinde týristik salany damytýǵa arnalǵan Úkimet saǵatynda Mádeniet jáne sport ministri Arystanbek Muhamediuly elektrondyq viza tetigi qashan engiziletinin aitty.
