Qazaqstanda jańa Ekologiialyq kodekstiń qabyldanýyna bailanysty aýaǵa normadan artyq lastaýshy zattar shyǵaratyn avtokólikterge aiyppul mólsheri artady, dep habarlaidy "Ult aqparat".
Bul Kodeks «lastaýshy tóleidi» printsipine sáikes keledi. QR Ákimshilik quqyq buzýshylyq týraly kodeksine (334 bap) engizilgen ózgeristerge sáikes, shyǵaryndylardaǵy lastaýshy zattardyń mólsheri belgilengen normativterden assa, jeke kólik iesi 10 AEK, zańdy tulǵalar 100 ailyq eseptik kórsetkishmólsherinde aiyppul tóleidi. Al buzýshylyq bir jyl ishinde qaitalansa - jeke tulǵalarǵa 20, zańdy tulǵalarǵa 200 AEK aiyppul salynady. Jańa norma shilde aiynda kúshine enedi. Al ázirge qoldanystaǵy zańnamaǵa sáikes jeke tulǵalarǵa eskertý jasalady nemese - 2, qaitalanǵan jaǵdaida 5 AEK kóleminde ǵana aiyppul jazylady.
2021 jyldyń 1 qańtarynan Qazaqstanda 1 AEK - 2917 teńgeni quraidy.
«Sonymen birge óńirlerdiń ekologiialyq problemalaryn keshendi sheshý boiynsha Jol kartalary qabyldanǵanyn, atalǵan qujattarda avtokólik shyǵaryndylaryn azaitý baǵytynda atqarylatyn is-sharalar da qarastyrylǵanyn atap ótkimiz keledi. Mysaly, Nur-Sultan qalasynyń Jol kartasyna sáikes, tehnikalyq baiqaý ortalyqtaryna qoiylatyn talaptar qatańdatylady. Buryn tehbaiqaý pýnkterin ashqysy keletin kásipker ol týraly tek habarlaýǵa tiis bolsa, endi arnaiy ruqsat alýy qajet. Mundai ortalyqtarǵa biryńǵai baǵdarlamalyq qamtamasyz etý de engiziledi. Saqtandyrý polisin alý kezinde tehnikalyq baiqaýdan ótý mindettemesi júkteledi. Sonymen qatar tehbaiqaý operatorynyń qyzmetin toqtata otyryp, mindetti tehnikalyq baiqaýdy uiymdastyrý jáne ótkizý qaǵidalaryn buzǵany úshin ákimshilik aiyppuldardy ulǵaitý da qarastyrylǵan», - dedi Ekologiia ministrliginen.
Aita keteiik, elimizde ekologiialyq talaptarǵa sáikes kelmeitin avtokólikter tehbaiqaý kezinde, Ekologiia departamentteri Ishki ister basqarmasynyń nemese kóliktik baqylaý organdarynyń birlesken reidteri barysynda, kásiporyndarǵa júrgiziletin profilaktikalyq tekserý kezinde anyqtalady. Avtokólikten shyǵatyn lastaýshy zattar normativteriniń saqtalýyn Ekologiia departamentteri gaztaldaǵysh «Avtotest», «Meta-01» jáne ózge de ólsheý quraldary arqyly tekseredi.
Eske salaiyq, 2021 jyldyń 2 qańtarynda Memleket basshysy Qasym-Jomart Toqaev Qazaqstan Respýblikasynyń jańa Ekologiialyq kodeksine qol qoidy.
