Eńbek jáne halyqty áleýmettik qorǵaý ministri Birjan Nurymbetov 2020 jyldyń sońyna deiin ataýly áleýmettik kómekti azamattyń áleýmettik tsifrlyq ámiiany arqyly tóleý tetigi ázirlenetinin habarlady. Jańa mehanizm pilottyq rejimde iske asyrylatyn bolady, - dep habarlaidy «Ult aqparat».
Al onyń aldynda prezident Qasym-Jomart Toqaev birinshi qyrkúiekte jariialaǵan joldaýynda zeinetaqy men járdemaqyny taǵaiyndaý jumystaryn barynsha tsifrlandyrýdy tapsyrdy. Soǵan orai ministr Nurymbetov eńbek jáne halyqty áleýmettik qorǵaý ministrliginiń birshama daiyndyq júrgizgenin málimdedi.
"Memleket basshysynyń tapsyrmasyn oryndaý maqsatynda eńbek jáne tsifrlyq damý, saýda jáne integratsiia ministrlikteri biraz daiyndyq jumystaryn júrgizdi. Ataýly áleýmettik kómekti áleýmettik tsifrlyq ámiian arqyly tóleý tetigin pilottyq rejimde 2020 jyldyń sońyna deiin iske asyrylady. Áleýmettik tsifrlyq ámiian azamattyń jeke sáikestendirý nómiri (JSN) arqyly júrgiziledi", – dedi Nurymbetov.
Sonymen qatar memleket basshysynyń tapsyrmasyn oryndaý maqsatynda ekinshi kezeńde respýblikalyq, jergilikti biýdjetterden, áleýmettik saqtandyrý jáne biryńǵai jinaqtaýshy zeinetaqy qorlarynan tólenetin zeinetaqy men járdemaqylardy áleýmettik tsifrlyq ámiian arqyly tóleý tetikteri iske asyrylady. Ekinshi kezeń 2021-2022 jyldary iske asady dep josparlanyp otyr.
Ekinshi kezeńde eńbek jáne tsifrlyq damý, saýda jáne integratsiia ministrlikteri Ulttyq bank jáne Qarjy naryǵyn retteý agenttigimen birlesip jumys isteitin bolady. Olar respýblikalyq, jergilikti biýdjetterden, áleýmettik saqtandyrý ári Biryńǵai jinaqtaý zeinetaqy qorlarynan tólenetin zeinetaqy men járdemaqylardy tsifrlandyrý jumystaryn birlese júzege asyrady.
Sonymen qatar ministr Nurymbetov ministrliktiń 41 memlekettik qyzmettiń 34-in elektrondy formatqa aýystyrǵanyn habarlady.
"Dei turǵanmen, másele áli de bar. Azamattardyń kei qujatyn, ásirese, Keńes odaǵy kezindegi qujattardyń elektrondy qorlarynda tsifrlyq nusqalarynyń tolyq bolmaýy jaǵdaidy qiyndatyp otyr", – dedi Nurymbetov.
Bul máseleni sheshý úshin tiisti memlekettik organdar tsifrlyq damý, innovatsiialar jáne aeroǵarysh ministrligimen birge 2020 jyldyń aiaǵyna deiin zeinetaqy jáne járdemaqy taǵaiyndaýǵa qajetti eski qujattardy tsifrlandyrý múmkindigin pysyqtap, aiaqtaý merzimin naqtylaidy.
Búginde respýblikalyq biýdjetten jylyna 3,4 trillion teńgege áleýmettik tólemderdiń 39 túri tólenedi. Barlyq tólem azamattardyń ekinshi deńgeili bankterdegi shotyna aýdarylyp otyrady.
Aita keteiik, memleket basshysy Qasym-Jomart Toqaev 2020 jylǵy Qazaqstan halqyna Joldaýynda azamattarǵa jaǵdai jasaý úshin tólemderdi tsifrlandyrý boiynsha sharalar qabyldaýdy tapsyrdy. Sonymen qatar tsifrlyq áleýmettik ámiian engizý kerek ekenin aitty.
Sondai-aq, memleket basshysynyń tapsyrmasymen 2020 jyldyń sońyna deiin birqatar mańyzdy qujat tsifrlyq formatqa aýysady. Onyń ishinde júrgizýshi kýáligi, avtokóliktiń tehnikalyq qujaty, tólqujat pen joǵary bilim týraly diplom, stýdenttik bilet bar. Sonymen qatar jyl sońyna deiin otyzǵa jýyq suranysqa ie anyqtamany alyp tastaý josparlanyp otyr.
