Qazaqstanda koronavirýsqa qarsy vaktsina tapshylyǵy bolmaýy tiis. Bul týraly búgin tikelei efirde QazCOVID-in vaktsinasyn alǵan QR Densaýlyq saqtaý ministri Aleksei Tsoi aitty, dep habarlaidy "Ult aqparat".
«Ózderińizde biletindei, vaktsina qai ýaqytta jetkiziletindigine qatysty Qazaqstannyń árbir óńiri boiynsha naqty keste bar. Kúni keshe ǵana Batys Qazaqstanǵa vaktsina jetkizildi jáne kún saiyn, eki kúnde bir ret jańa partiiasy jetkizilip otyrady. Sondyqtan aitarlyqtai tapshylyq oryn ala qoimaýy kerek. Eń bastysy, azamattarymyz vaktsinanyń qaýipsiz, tiimdi ekendigine kóz jetkizdi. Ol antidene titrin kóteretindigin kórdi jáne týǵan-týystaryna ózin, jaqyndaryn qorǵaý úshin vaktsinatsiiadan ótýge keńes berýde», - dedi Aleksei Tsoi vaktsinadan keiin «Habar 24» telearnasy tilshisine bergen suhbatynda.
Onyń dereginshe, búginde árbir 20-shy qazaqstandyq vaktsina aldy. Iaǵni, vaktsinatsiia qarqyny jaqsy ótip jatyr.
«Bizdiń mindetimiz – múmkindik berý. Al odan keiin azamattar vaktsina alýdy ózderi tańdap, oqshaýlanýdan shyǵýdyń jalǵyz joly sol ekendigin túsinip otyr», - dedi Densaýlyq saqtaý ministri.
Eske salaiyq, búgin, 26 sáýirde halyqty koronavirýsqa qarsy QazVac vaktsinasymen egý bastaldy. Densaýlyq saqtaý ministri Aleksei Tsoi alǵashqylardyń biri bolyp otandyq vaktsinamen ekpe aldy.
