Foto: QR OAM
Balalardy qorǵaý kúni qarsańynda «Ánshýaq» balalar ánderiniń respýblikalyq festivali elordada gala-kontsertpen qorytyndylandy. Aýqymdy shyǵarmashylyq joba elimizdiń barlyq óńirlerin qamtydy, ol Memleket basshysy bastamashylyq etken «Qazaqstan balalary» onkúndiginiń eń jarqyn oqiǵasyna ainaldy, dep habarlaidy Ult.kz.
Maqsaty – balalar arasynda mýzyka mádenietin damytý, patriottyq sezimderin nyǵaitý jáne «Adal azamat» tujyrymdamasynyń negizi bolǵan jalpyulttyq qundylyqtardy dáripteý.
Jeńimpazdardy marapattaý rásimine oqý-aǵartý ministri Ǵani Beisembaev qatysty. Ol bul kúnderi jaýapty memlekettik organdar balalardyń ál-aýqatyn arttyrýǵa qatysty memlekettik baǵdarlamalardy, jobalar men bastamalardy keńinen tanystyrýda ekenin atap ótti.
«Bizdiń memleketimiz ár balanyń densaýlyǵyn qorǵaý, qaýipsizdigin saqtaý, bilimi men darynyn qoldaý maqsatynda aýqymdy sharalar qabyldaýda. Bul festival – tek óner merekesi ǵana emes, sonymen qatar jas urpaqtyń boiynda ana tilimizge degen súiispenshilik pen maqtanysh sezimin qalyptastyrýdyń jarqyn úlgisi. Mundai jobalar bala igiligi - memleket saiasatynyń basym baǵyty ekendiginiń taǵy bir dáleli», - dedi Ǵani Beisembaev.
Festival aiasynda 1 qyrkúiekten bastap elimizdiń túkpir-túkpirinde 6 jastan 18 jasqa deiingi balalar án shyrqady. Áleýmettik jelilerde #Ánshýaq #Ánshýaq2025 heshtegterimen 22 myńnan astam jandy daýysta balalar ánderi jariialandy. Jalpy qaralym sany 18 millionnan asty.
Kópshilik tyńdarmandar men qazylar alqasynyń daýys berý nátijesinde iriktelgen 13 úzdik án gala-kontsert sahnasynda shyrqaldy. Jeńimpazdarǵa Gran-pri, diplomdar jáne arnaiy marapattar tabystalady. Open Air formatyndaǵy kontsertter bul kúnderi elimiz boiynsha turǵyn úi aýlalarynda, saiabaqtarda, alańdarda ótýde.
«Ánshýaq» festivali Oqý-aǵartý ministrliginiń bastamasymen biyl ekinshi jyl qatarynan uiymdastyrylýda jáne ol mádeni, tárbie berý baǵytyndaǵy mańyzdy jobaǵa ainalyp keledi.
