QR Densaýlyq saqtaý ministri Eljan Birtanov bosanǵan analar ólimine sebep bolatyn negizgi máselelerdi atady, dep xabarlaidy QazAqparat tilshisi.
"Ókinishke qarai, búginde respýblika boiynsha analar ólimi kóbeiip otyr. Endi atalǵan kórsetkish birde joǵary, birde tómen bolyp jatady. Analar ólimine sebep bolatyn jaǵdailar kóp. Bunyń barlyǵy jan-jaqty zertteledi. Degenmen, buǵan deiingi jaǵdailardy alatyn bolsaq, taldaýdyń nátijeleri aýyr patologiianyń bolǵanyn kórsetip otyr. Al ondai patologiialar bolǵanda bala kóterýge bolmaidy. Degenmen, áielder oǵan qaramaidy. Sosyn júkti bolǵannan keiin aýrýxanaǵa durys qaralmaidy", - dedi E.Birtanov Astanada ótken baspasóz máslixatynda.
Ministr Astanadaǵy perinataldyq ortalyqta bolǵan jaǵdaidy da eske aldy. Ol kezde úsh birdei bosanǵan ana qaitys bolǵan edi.
"Endi, ondai kezde saraptama jasalady. Oǵan biraz ýaqyt ketedi. Sebebi patologoanatomdyq jáne morfologiialyq zertteý júrgiziledi. Qazirgi kezde dál osy saraptamalar áli de jasalyp jatyr. Bizde qoǵamdyq densaýlyq saqtaý komiteti bar. Aldaǵy ýaqytta komitet tóraǵasy Jandarbek Muxtaruly saraptamanyń qorytyndysyn jariialap, úsh ananyń ólimine sebep bolǵan máselelerdi mindetti túrde aityp beredi. Bul qupiia aqparat emes", - dep atap kórsetti E.Birtanov.
