QR Premer-Ministriniń orynbasary Eraly Toǵjanov Májilis depýtattarynyń elimizde ana kapitalyn engizýge qatysty saýalyna jaýap berdi, dep habarlaidy "Ult aqparat".
«2020 jyldyń qazanynda reseilik tájiribeni tyńǵylyqty zerdeleý maqsatynda TMD-ǵa qatysýshy memleketterdiń halqy eńbegi, jumyspen qamtylýy jáne áleýmettik qorǵalýy jónindegi konsýltatsiialyq keńestiń XXXIII otyrysynda bul másele qarastyryldy. Júrgizilgen jumystyń nátijesinde «Ana kapitaly» týýdy yntalandyrý jáne «tabiǵi kemý» syndy qubylysty eńserý úshin ýaqytsha is-shara ekendigin atap ótken oryndy. Yntalandyrý is-sharasy engizilgen kezde Resei Federatsiiasyndaǵy týýdyń jiyntyq koeffitsienti 1,4-ti qurady. Al atalǵan baǵdarlama júzege asyrylǵan kezdegi týýdyń jiyntyq koeffitsienti 0,1 tarmaqqa artty nemese 1,5-ke jetti. Bul baǵdarlamanyń tiimsizdigin kórsetedi. Bul rette Qazaqstandaǵy týýdyń jiyntyq koeffitsienti 2007 jyly 2,47-i bolsa, 2020 jyly 3,13-ke deiin ósti», - dedi vitse-premer jaýabynda.
Eraly Toǵjanovtyń atap ótýinshe, Qazaqstanda qoldanystaǵy ana men balany qoldaý júiesi ýaqyty ári merzimdi járdemaqy tólemine kepildik beredi. Ol júktilikke jáne týýǵa bailanysty áleýmettik tólemdi (ortasha ailyq jalaqynyń shamamen 40 paiyzy), bala týýyna arnalǵan járdemaqyny (1, 2, 3 balaǵa 110 846 teńge, tórt jáne odan kóp balaǵa 183 771 teńge), bala 1 jasqa tolǵanǵa deiingi kútimine arnalǵan tólemdi (16 802 teńgeden 25 962 teńgege deiin) qamtidy. Bul tólemder otbasynyń kirisine qaramastan beriledi. Buǵan qosa, bala 1 jasqa deiin kútim jasaityn áielderge ortasha ailyqtyń 10 paiyzy mólsherinde mindetti zeinetaqy jarnasyn sýbsidiialaý qarastyrylǵan. 2020 jyldan bastap kópbalaly otbasylarǵa otbasydaǵy bala sanyna bailanysty saralanǵan mólgerde járdemaqy taǵaiyndalyp, tólenip keledi. Tabysy tómen az qamtylǵan otbasylarǵa ataýly áleýmettik kómek taǵaiyndalady. Az qamtylǵan otbasydan shyqqan balalarǵa kepildendirilgen áleýmettik toptama beriledi.
«Buǵan qosa, búginde elimizdiń barlyq óńirinde jáne elordada az qamtylǵan jáne kópbalaly otbaylarǵa «bir tereze» qaǵidatymen qyzyǵýshylyq tanytqan barlyq saýaldaryna konsýltatsiialyq qyzmet kórsetetin «Januia» jáne «Shańyraq» otbasyna qoldaý institýty ortalyqtary jumys isteidi. Sonymen qatar ortalyqtarda balalarǵa jáne olardyń otbasylaryna, onyń ishinde múgedek jandarǵa psihologiialyq ári yntalandyrý treningteri, ózge de is-sharalar ótkiziledi», - dedi Úkimet basshysynyń orynbasary.
