Foto: Álihan Sariev, Tengrinews.kz
Qazaqstanda quqyq qorǵaý organdary suiytylǵan munai gazyn kóterme jetkizýshilerge qatysty tergeýdi aiaqtady. Bul týraly dúisenbide Prezident Qasym-Jomart Toqaevtyń baspasóz qyzmeti ókili aitty, - dep habarlaidy Tengrinews.kz.
"Suiytylǵan munai gazynyń alty iri kóterme jetkizýshisine qatysty tergeý aiaqtaldy. Suiytylǵan munai gazyn satýshylar jaǵdaidy paidalanyp, eń joǵary baǵa belgilengeni anyqtaldy", - delingen habarlamada.
"Qazaqoil Aqtóbe" JShS-ne qatysty ákimshilik aiyppul salý týraly sot sheshimi shyǵaryldy. "SNPS-Aqtóbemunaigaz" AQ jáne "SP Qazgermunai" JShS-ne qarsy ákimshilik ister qozǵalyp, sotqa berilgen.
Al Petrosun JShS jáne "Qazaq gaz óńdeý zaýyty" JShS qatysty qylmystyq ister qozǵalyp, "QazMunaiGaz" UK" AQ boiynsha is materialdary qarjy monitoringi agenttigine berilgen.
Sondai-aq, "Qazaq gaz óńdeý zaýyty" JShS-niń áreketterinde suiytylǵan munai gazyn ótkizý kólemin zańsyz qysqartý derekteri anyqtalǵan.
Baspasóz qyzmeti málimetinshe, básekelestikti qorǵaý jáne damytý agenttigi suiytylǵan munai gazyn bólshek saýdada ótkizýshilerge qatysty 193 tergeý júrgizip jatyr, onyń 89-y Bas prokýratýramen birlesip júrgiziledi.
"Naryqtyń 65 sýbektisiniń is-áreketinde kelisilgen is-qimyldar men karteldik sóz bailasý derekteri anyqtaldy. 45 sýbektige qatysty ákimshilik is qozǵaldy, materialdar sotqa joldandy. Ákimshilik aiyppuldyń jalpy somasy 92 million teńge bolady", - delingen habarlamada.
Qańtarda Qazaqstanda suiytylǵan gaz baǵasynyń ósýine bailanysty jappai narazylyq ótti. Narazylyqtar Jańaózen men Aqtaýda bastaldy, sodan keiin basqa qalalarda, sonyń ishinde Almatyda da jalǵasty.
5 qańtarda Memleket basshysy Bas prokýratýraǵa básekelestikti qorǵaý agenttigimen birlesip suiytylǵan munai gazyn satýmen ainalysatyn kompaniialarǵa qatysty tergeý júrgizýdi tapsyrdy.
