Foto: Vecher.kz
Qazaqstanda Dúniejúzilik kreativ kúni aiasynda alǵash ret Ulttyq kreativ festivali ótip jatyr. Is-sharany QR Mádeniet jáne aqparat ministrliginiń qoldaýymen Qazaqstannyń kreativti indýstriia aliansy (CIAQ) uiymdastyrýda, dep habarlaidy Ult.kz.
Festival otandyq mádeniet, óner jáne bilim berý salasy ókilderiniń basyn qospaq. Atalmysh is-shara 21–26 sáýir aralyǵynda elimizdiń alty qalasynda — Astana, Almaty, Pavlodar, Atyraý, Óskemen jáne Shymkentte ótedi. Festival barysynda sheberlik saǵattary, dárister, shyǵarmashylyq zerthanalar, dizainerler, sýretshiler men illiýstratorlardyń kórmeleri, qolónershiler jármeńkeleri ótedi. Sonymen qatar ártister sahnada óner kórsetip, bilim berý mekemeleri, qalalyq bastamalar, biznes pen qoǵamdyq uiymdar jobalaryn tanystyrý sekildi 100-den astam is-shara josparlanǵan.
Ulttyq kreativ festivaliniń maqsaty – el turǵyndary men qonaqtaryna qatysýshylardy tanystyryp, kreativti indýstriianyń damýyn qoldaý. Búginde bul sala álemniń kóptegen elinde jańa jumys oryndarynyń ashylýyna, biznestiń damýyna, mádeni qundylyqtardy jahanǵa tanytýǵa jáne innovatsiiaǵa oń áser etetin qozǵaýshy kúsh retinde tanyldy.
BUU málimeti boiynsha, jahandyq deńgeide kreativti indýstriiaǵa álemdik JIÓ-niń shamamen 3,1%-y tiesili jáne bul salada eńbekke qabiletti halyqtyń 6,2%-y jumys isteidi. Olardyń ishinde jastar úlesi erekshe.
Sarapshylardyń boljamy boiynsha, 2030 jylǵa qarai bul sala álemdik JIÓ-niń 10%-yn quraýy múmkin. Al Qazaqstanda 2029 jylǵa deiin kreativti indýstriianvń el ekonomikasyna qosatyn úlesi 2%-ǵa deiin ósedi dep kútilýde.
Eske salaiyq, BUU Bas Assambleiasy 2017 jyly 21 sáýirdi Dúniejúzilik kreativ pen innovatsiialar kúni dep jariialaǵan bolatyn. Bul kúnniń maqsaty — shyǵarmashylyq jumystyń ómirdiń barlyq salalaryndaǵy mańyzyna nazar aýdarý.
Festivaldi uiymdastyrý komiteti atap ótkendei, Qazaqstannyń Dúniejúzilik kreativ kúnin atap ótýi — eldiń kreativti ekonomikaǵa kórsetken qoldaýy men mádeniet, bilim, innovatsiialar salasynda halyqaralyq seriktestik jolyndaǵy mańyzdy qadam. Uiymdastyrýshylar 2026 jyly festival aiasyn keńeitip, eldiń barlyq óńirlerin qamtýdy josparlap otyr.
