Foto: Meditsinalyq ortalyq
QR Prezidenti Is Basqarmasy Meditsinalyq ortalyǵynyń aýrýhanasynda qaterli óspedegi súiek metastazyn emdeýdiń biregei ádisi qoldanyla bastaidy. Bul týraly QR PIB MO aýrýhanasynyń baspasóz qyzmeti málim etti, dep habarlaidy Kazinform HAA.
Mundai innovatsiialyq terapiia patsientterge asqynyp ketken qaterli isikpen kúresýdiń jańa tásilderin usyna otyryp, onkologiialyq kómek sapasyn arttyrýdaǵy mańyzdy qadam bolmaq.
Ádis «Samarii, 153sm-Oksabifor» radiofarmatsevtikalyq preparatyn qoldana otyryp jasalady. Bul preparat metastaz nemese synǵan jer sekildi súiektiń zaqymdanǵan aimaqtaryna jinalady da saý tinderge áser etpesten olardy β-bólshektermen sáýlelendiredi. Ádis belgili bir bólikke baǵyttalǵandyqtan aýyrsynýdy jeńildetip, dárilerge degen qajettilikti azaitady, sondai-aq súiek tinindegi syrqattyń asqynýyn baiaýlatýǵa kómektesedi.
«Ádistiń ereksheligi — dástúrli emdeý tásilderinde bolatyn janama áser men qaýip azaiyp, patsientterdiń ómir súrý sapasy aitarlyqtai jaqsarady. Bul, ásirese, sozylmaly syrqat pen metastazy asqynǵannan zardap shegetin naýqastar úshin óte mańyzdy», — deidi Densaýlyq saqtaý ministrliginiń Iadrolyq meditsina jónindegi shtattan tys bas mamany, Prezident Is Basqarmasy Meditsinalyq ortalyǵy aýrýhanasynyń Iadrolyq meditsina ortalyǵynyń basshysy, meditsina ǵylymdarynyń doktory Aigúl Sádýaqasova.
Meditsinalyq ortalyq aýrýhanasynda 27-29 qarasha aralyǵynda jańa tehnologiiany engizýge arnalǵan sheberlik saǵaty ótedi. Is-sharaǵa Qazaqstan men Reseidiń iadrolyq meditsina salasyndaǵy jetekshi mamandary qatysady. Shaqyrylǵan sarapshylardyń qatarynda A. M. Nikiforov atyndaǵy Búkilreseilik jedel jáne radiatsiialyq meditsina ortalyǵynyń Izotoptyq diagnostika jáne emdeý ádisteri zerthanasynyń meńgerýshisi (Sankt-Peterbýrg q.) Viacheslav Sýhov jáne A. F. Tsyba atyndaǵy Meditsinalyq radiologiialyq ǵylymi ortalyǵynyń Ashyq radionýklidtermen radiohirýrgiialyq emdeý bóliminiń meńgerýshisi (Obninsk q.) Valerii Krylov, sondai-aq radionýklidtik terapiia salasyndaǵy tanymal kóshbasshylar bar. Aýrýhana dárigerleri iadrolyq meditsinany damytýdaǵy jetistigin tanystyrady jáne praktikalyq tájiribesin bólisedi.
Sheberlik saǵatyna qatysý tegin jáne barlyq qatysýshy sertifikat alady. Qazaqstanda radionýklidtik terapiiany engizý patsientterge qaterli isikti emdeýdiń zamanaýi tehnologiialaryna qol jetkizýge múmkindik beredi, terapiia nátijesin jaqsartady jáne eldiń innovatsiialyq meditsina salasyndaǵy ustanymyn nyǵaitady.
