Foto: ashyq derekkóz
QR Oqý-aǵartý ministrligi «Órleý» biliktilikti arttyrý ulttyq ortalyǵy pedagogterdiń turaqty kásibi damýyna, mentaldyq saýlyǵyna qamqorlyq jasaýǵa baǵyttalǵan mańyzdy bastamany iske qosty, dep habarlaidy Ult.kz.
Túrkistan jáne Aqtóbe oblystarynyń ortalyq filialdarynda alǵash ret pedagogterge arnalǵan psihologiialyq qoldaý kabineti ashyldy.
Pilottyq joba muǵalimderdiń mentaldyq densaýlyǵyn qoldaýǵa, kásibi kúizelistiń aldyn alýǵa jáne stressti basqarýǵa múmkindik beredi.
Kabinette kásibi psiholog jeke jáne toptyq keńes ótkizedi, relaksatsiia men art-terapiia sabaqtaryn uiymdastyrady, túrli treningter men psihologiialyq diagnostika júrgizedi. Bul qyzmetterdi pedagogter «Órleý» ortalyǵynda biliktilikti arttyrý kýrstarynan ótý kezinde paidalana alady. Jumys barysynda etikalyq normalar, eriktilik jáne qupiialylyq qaǵidattary qatań saqtalady. Aldaǵy ýaqytta osyndai kabinetti elimizdiń basqa óńirlerinde de ashý josparlanyp otyr.
