Sýret: Mádeniet jáne aqparat ministrligi
Qazaqstanda alǵash ret Leonardo da Vinchidiń qupiiaǵa toly biregei jaýharlarynyń biri «Ádemi hanshaiym» (La Bella Principessa) kartinasy kópshilik nazaryna usynyldy. Bul týraly Mádeniet jáne aqparat ministrliginiń baspasóz qyzmeti málimdedi.
«La Bella Principessa» – bul XV ǵasyrdyń sońynda Leonardo da Vinchidiń qolynan shyqqan italialyq aqsúiekter áýletinen shyqqan jas qyzdyń portreti. Kartina kezinde joǵalyp ketip, qaitadan tabylǵan. Bul – qupiiaǵa toly biregei týyndylardyń biri.
Kórmege arnalǵan baspasóz máslihatynda QR Mádeniet jáne aqparat ministrligi Mádeniet komitetiniń tóraǵasy Kúmis Seiitovanyń aitýynsha, atalǵan is-shara Qazaqstan men Italiianyń mádeniet pen óner salasyndaǵy yntymaqtastyǵyn damytýǵa jańa serpin beredi.
«Leonardo da Vinchi – adamzat tarihyndaǵy eń uly tulǵalardyń biri. Onyń keskindeme, ǵylym, injeneriia jáne anatomiia siiaqty kóptegen saladaǵy jetistikterin atap ótýge bolady. Onyń talanty men álemdi ózgeshe kórý qabileti beineleý óneriniń birqatar keremet týyndylaryn jasaýǵa, adam tanymynyń ártúrli salalaryna aitarlyqtai úles qosqan ǵylymi jańalyqtar jasaýǵa múmkindik berdi. Qazaqstandyqtar úshin aty ańyzǵa ainalǵan sýretshiniń jumysyn óz kózimen kórýge erekshe múmkindik týyp otyr», –dedi Kúmis Seiitova.
Aita keteiik, buryn atalǵan kartina búkil álem boiynsha nebári bes ret kórsetilgen. Ár kórme saiyn synshylar men kórermenderdiń úlken qyzyǵýshylyǵyn týdyrǵan.
Kórme 7 maýsym men 4 tamyz aralyǵynda QR Ulttyq mýzeiiniń mýltimediialyq zalynda ótedi.
