Qazaqstanda áleýmettik qaterler týyndaǵan kezde beriletin áleýmettik tólemniń ortasha mólsheri 69%-ǵa deiin ósti, dep habarlaidy "Ult aqparat" QR Eńbek jáne halyqty áleýmettik qorǵaý ministrliginiń baspasóz qyzmetine silteme jasap.
Memlekettik áleýmettik saqtandyrý qorynanáleýmettik járdemaqy taǵaiyndaý kezinde jańa parametrlerdiń qoldanylýyna bailanysty olardyń ortasha mólsheri 5 aidyń qortyndysy boiynsha ótken jyldyń sáikes kezeńimen salystyrǵanda 69%-ǵa ósti.
Jańa parametrler 2020 jyldyń basynan bastap eńbek etý qabiletinen aiyrylý, asyraýshysynan aiyrylý jáne jumysynan aiyrylý boiynsha áleýmettik tólemder taǵaiyndaý kezinde qoldanylady.
2020 jyldyń 5 aiynyń qorytyndysy boiynsha ótken jyldyń uqsas kezeńimen salystyrǵanda eńbek etý qabiletinen aiyrylǵan jaǵdaida tólenetin áleýmettik tólemniń ortasha mólsheri 14 855 teńgeden 24 828 teńgege deiin nemese 67%-ǵa, asyraýshysynan aiyrylǵan jaǵdaida 17 564 teńgeden 24 880 teńgege deiin nemese 42%-ǵa, jumysynan aiyrylǵan jaǵdaida 23 310 teńgeden 39 366 teńgege deiin nemese 69%-ǵa ósti.
Esterińizge sala keteiik, 1 qańtardan bastap «Mindetti áleýmettik saqtandyrý týraly» zańy kúshine endi. Qujat MÁSQ-tan áleýmettik tólem taǵaiyndaý kezinde parametrlerdi qaita qaraý esebinen áleýmettik tólemniń ortasha mólsheriniń ósýin qamtamasyz etti.
Máselen, 1 qańtardan bastap eńbek etý qabiletinen aiyrylý boiynsha áleýmettik tólemniń mólsheri meditsinalyq-áleýmettik saraptama negizinde naqty belgilengen jalpy eńbek etý qabiletinen aiyrylý dárejesine (30%-dan 100%-ǵa deiin) bailanysty aiqyndalady. Buryn ortasha koeffitsientter qoldanylǵan. Sonymen, eger buryn eńbek etý qabiletinen 95% aiyrylý dárejesi kezinde 0,7 koeffitsienti qoldanylǵan bolsa, jańa ádispen - 0,95 koeffitsienti qoldanylady.
Asyraýshysynan aiyrylǵan otbasylardyń áleýmettik qorǵalýyn arttyrý maqsatynda sondai-aq asyraýyndaǵy adamdar sanynyń koeffitsientteri ulǵaityldy: asyraýynda bir adam bolǵan jaǵdaida 0,4-ten 0,5-ke deiin; eki – 0,5-ten 0,65-ke deiin; úsh – 0,6-dan 0,8-ge deiin; asyraýynda tórt jáne odan kóp adam bolǵan kezde 0,8-den 1-ge deiin.
Budan basqa, jumysynan aiyrylǵan adamdardyń áleýmettik qorǵalýy arttyryldy. Jumysynan airylǵan jaǵdaida Memlekettik áleýmettik saqtandyrý qorynan áleýmettik tólemder jumysynan airylǵan jáne turǵylyqty jeri boiynsha jumyspen qamtý ortalyǵynda jumyssyz retinde tirkelgen mindetti áleýmettik meditsinalyq saqtandyrý júiesine qatysýshyǵa taǵaiyndalady.
Eger buryn jumysynan aiyrylǵan kezde tabysty almastyrý deńgeii sońǵy 2 jyldaǵy ortasha tabystyń 30%-yn qurasa, endi atalǵan kórsetkish 40%-ǵa deiin ulǵaidy.
Bul rette, eger buryn kórsetilgen tólem 1 aidan 4 aiǵa deiin taǵaiyndalǵan bolsa, 2020 jyldan bastap 1 aidan 6 aiǵa deiin mindetti áleýmettik saqtandyrý júiesine qatysý ótiline bailanysty taǵaiyndalady.
