Májilistiń jalpy otyrysynda «2022-2024 jyldarǵa arnalǵan respýblikalyq biýdjet týraly» QR Zańyna ózgerister men tolyqtyrýlar engizý týraly» zań jobasy maquldandy, dep habarlaidy QazAqparat.
«2022 jylǵa arnalǵan respýblikalyq biýdjetti naqtylaý týraly zań jobasy usynylyp otyr. Zań jobasy Memleket basshysynyń aǵymdaǵy jyldyń basynda bergen tapsyrmalaryn jáne memlekettiń basqa da shuǵyl mindettemelerin iske asyrýǵa baǵyttalǵan. Atalǵan baǵyttar boiynsha biýdjet shyǵystary 2,7 trln teńgege artyp otyr», - dedi QR Premer-Ministriniń orynbasary - Qarjy ministri Erulan Jamaýbaev.
Biýdjet shyǵystary kelesi kózder esebinen ulǵaityldy:
- biýdjettiń óz kiristeri -1,1 trln teńge;
- Ulttyq qordan kepildendirilgen transfert - 1,6 trln teńge.
«Bul rette Ulttyq qordyń túsimderi men shyǵystarynyń teńgerimi jyl sońynda oń bolady dep boljanady. Kiristeri men shyǵystarynyń qaita qaralýyn eskere otyryp, 2022 jylǵa arnalǵan respýblikalyq biýdjettiń parametrleri kelesidei qalyptasty. Biýdjet túsimderi 2,7 trln. teńgege ulǵaia otyryp, 15,8 trln teńgeni quraidy. Tapshylyq Jalpy ishki ónimge 3,3% deńgeiinde saqtaldy. Respýblikalyq biýdjettiń shyǵystary 2,7 trln teńgege óse otyryp, 18,8 trln teńge kóleminde josparlanyp otyr», - dedi ol.
Onyń sózine qaraǵanda, Prezidenttiń tapsyrmalaryn iske asyrýǵa 1,8 trln teńge baǵyttaý usynylyp otyr. Bul kúsh qurylymdary men tótenshe jaǵdailar organdarynyń jaýyngerlik ázirligi men jaraqtandyrylýyn kóterýge, óńirler men biznesti qoldaýǵa, halyqtyń tabysyn arttyrýǵa, elimizdiń azyq-túlik qaýipsizdigin qamtamasyz etýge jáne ekonomikany diversifikatsiialaýǵa arnalǵan shyǵystar.
«Biýdjetti naqtylaý nátijesinde naqty sektor men óńirlerdi qoldaý kúsheitildi. Buny biýdjet shyǵystarynyń qurylymy kórsetip otyr. Iaǵni shyǵystar ósiminiń basym bóligi ekonomikanyń naqty sektoryn qoldaýǵa kózdelgen. Bul 1,3 trln teńge. Tiisinshe, shyǵystardyń jalpy kólemindegi osy baǵyttyń úlesi 5 paiyzdan astamǵa ulǵaidy. Nátijesinde, atalǵan salaǵa arnalǵan shyǵystar 3,4 trln teńge nemese jalpy shyǵystardyń 17,9% mólsherinde josparlanyp otyr. Osyndai yntalandyrý orta merzimde eldiń damýyna mýltiplikativtik áser etedi. Bul biýdjet kiristeriniń qarqyndy ósýine negiz bolyp tabylady», - dedi ministr.
Atap aitqanda, áleýmettik bloktyń shyǵystary 581 mlrd teńgege ulǵaityldy jáne 8,6 trln teńge nemese biýdjettiń jalpy shyǵystarynyń 46%-y deńgeiinde josparlanýda.
Kúsh qurylymy shyǵystary 446 mlrd teńgege ósip, 2,2 trln teńge somasynda josparlanǵan.
«Jalpy kózdelgen shyǵystardyń 30%-ǵa jýyǵy nysanaly transferttermen óńirlerge beriletin bolady. Olardyń jalpy somasy 818 mlrd teńge bolsa, onyń ishinde damýǵa arnalǵan transfertter – 475 mlrd teńge. Naqtylaýdy eskere otyryp, óńirlerge respýblikalyq biýdjetten jalpy shyǵystardyń 5,5 trln teńgeden astamy nemese 29,3%-y baǵyttalatyn bolady», - dedi Jamaýbaev.
