Biyl elimizde aqyly joldardyń sany artady. Aqyly bolatyn jańa jol baǵyttary týraly «QazAvtoJol» ulttyq kompaniiasy AQ-nyń aqyly avtomobil joldary bóliminiń basshysy Arman Eshanov aityp berdi, dep habarlaidy QazAqparat.
«Búgingi tańda elimizde 4 aqyly avtojol bar. Olar: «Almaty-Qorǵas», «Almaty-Qapshaǵai», «Nur-Sultan-Temirtaý» jáne «Nur-Sultan-Shýche» baǵytyndaǵy jol. Baǵa týraly aitsaq, jeńil kólikterge shaqyrymyna 1 teńge, al salmaǵy 15 tonnadan asatyn júk kólikteri ár shaqyrym úshin 25 teńge tóleidi. Tarif 2013 jyly bekitildi, sodan beri jol baǵasy ózgergen joq. Biyl aqyly bolatyn joldarǵa da osy tarif saqtalady. Iaǵni josparda tarifti ózgertý máselesi turǵan joq. Jol beketterinde aqy tóleýdiń 20-dan astam ádisi bar. Tóleý beketterinde qolma-qol aqsha arqyly, aldyn ala ekinshi dárejeli bankterdiń qosymshalary, terminal men SMS arqyly tóleýge bolady. Sondai-aq bizdiń kompaniiamyzdyń arnaiy mobildi qosymshasy da bar. Onda barlyq baǵyt boiynsha tólemdi aldyn ala eseptep shyǵarýǵa bolady», - dedi A. Eshanov «QazAvtoJol» ulttyq kompaniiasy AQ uiymdastyrǵan baspasóz týry barysynda.
Odan bólek, kompaniia ókili biyl aqyly bolatyn avtokólik joldary týraly aitty.
«Biyl «Batys Eýropa-Batys Qytai» baǵytyndaǵy jol ýchaskeleri aqyly bolady. Atap aitqanda, «Shymkent-Tashkent», «Shymkent-Qyzylorda», «Taraz-Qainar», «Taraz-Shymkent», «Nur-Sultan-Pavlodar», «Qapshaǵai-Taldyqorǵan» baǵytyndaǵy joldar. Bul baǵyttardyń baǵasy da bekitilgen tarifke sáikes júzege asyrylady. Turǵyndar tarapynan jol aqysyna qatysty suraq týyndasa, bizdiń 1403 call-ortalyǵyna habarlasýǵa bolady», - deidi ol.
Aita keteiik, «QazAvtoJol» ulttyq kompaniiasy AQ «Ortalyq-Ońtústik» baǵytyndaǵy Nur-Sultan – Qaraǵandy – Balqash - Priozersk – Býrylbaital - Shý – Almaty aimaqtaryndaǵy joldardyń salyný barysyn tanystyryp, kórsetý maqsatynda baspasóz týryn uiymdastyrdy.
