Almatyda olshem.kz saity iske qosyldy. Jańa resýrs – bul jobaǵa qatysyp otyrǵan 25 portaldyń Qazaqstanda kásibi jáne ashyqtyq deńgeii joǵary naryqty qurý baǵytyndaǵy umtylysynyń nátijesi.
Otandyq naryq úshin jańa atalmysh resýrs - olshem.kz saity derekter analitikasy salasyndaǵy Chartbeat atty ozyq kompaniiamen birlese otyryp júzege asyryldy. Kompaniianyń qyzmetterin AQSh media naryǵynyń 75%-y qoldanady. Ashyq, aiqyn ári kásibi media naryǵyn qalyptastyrý maqsatynda jetekshi qazaqstandyq internet-basylymdardyń birlesken sheshimi retinde qurylǵan bul veb-sait óz jumysynda eń úzdik halyqaralyq standarttardy qoldanatyn bolady.
Chartbeat tehnologiialary otandyq BAQ-qa óz oqyrmandarynyń shynaiy qajettilikterin eskere otyryp, biznes úderisterdi ornatý arqasynda jarnama berýshilerdi keńinen tartýǵa múmkindik bermek. Zamanaýi quraldar men ozyq tehnologiialardy qoldaný jýrnalistika sapasyn kóterip, otandyq BAQ naryǵynyń kásibi deńgeiiniń ósýine ákelmek.
«Qazaqstan tarihynda tuńǵysh ret 25 otandyq internet BAQ oqyrmandarmen jáne jarnama berýshilermen óz qatynasynda adaldyqty ustanatyndyǵyn ashyq túrde kórsetý jóninde óz erkimen sheshim qabyldady. Chartbeat tehnologiialary arqasynda olar óz statistikasynyń kórsetkishterin, sonyń ishinde buǵan deiin jariialanbaǵan kórsetkishterdi ashyp kórsetpek. Bul oqyrmandardyń qajettilikterin tereńirek túsinip, aýditoriiany tartý, qazaqstandyqtar úshin shynymen de mańyzdy ári qajetti reportajdar men longridterdi daiyndaýǵa baǵyttalǵan kóbirek kontentti jasap shyǵarý úshin qazaqstandyq jýrnalisterge arnalǵan biregei múmkindik», - dep óz boiymen bólisti Chartbeat jobasy Qamqorshylar keńesiniń tóraǵasy Mihail Dorofeev.
Sait Qazaqstandaǵy Chartbeat aptalyǵy aiasynda iske qosyldy. 4 naýryzdan bastap bilim berý baǵdarlamalary jónindegi aǵa basshy Djill Nikolson jáne klienttermen jumys júrgizý jónindegi menedjer Kara MakKloýski Almaty jáne Astana qalalarynda bilim berý treningteriniń toptamasyn ótkizip, joba qatysshylarynyń redaktsiialarynda bolyp qaitady. Sondai-aq, sapar aiasynda jarnama naryǵynyń qatysýshylary úshin Chartbeat servisiniń quraldaryna arnalǵan seminarlar jáne QR Aqparat jáne qoǵamdyq damý ministrligimen kezdesý ótkiziledi.
«Qazaqstandaǵy AQSh elshiligi Qazaqstan halqy men Úkimeti úshin mańyzdy birqatar bastamalarǵa úlken maqtanyshpen qoldaý kórsetýdi jalǵastyryp keledi. Osyndai bastamalardyń biri – el ishinde myqty ári kásibi jýrnalistikany ilgeriletý. Qazaqstan Úkimeti jáne qazaqstandyq qoǵam AQSh-ta qoldanylatyn innovatsiialar men tehnologiialarǵa qyzyǵýshylyq tanytyp otyr. AQSh bas konsýly retinde men bul joba osy tehnologiialardyń keibireýin endirip, osylaisha Qazaqstandaǵy myqty jýrnalistikan qoldaǵa óz úlesin qosady dep úmittenemin», - dep atap ótti AQSh bas konsýly Erik Meier.
Olshem.kz resýrsy jarnama naryǵyna jobaǵa qatysatyn portaldardyń oqyrmandar aýditoriiasy jaily shynaiy aqparat alýǵa múmkindik bermek. Bul BAQ-ta jariialanatyn materialdardyń maqsatqa baǵyttylyǵyn arttyrmaq. Chartbeat servisterin qoldanatyn media resýrstar jarnama naryǵymen tolyq ári naqty analitikamen bólisetin bolady. Olar kontent sapasyn jaqsartyp, redaktsiialyq saiasatty jańa jaǵdailarǵa sáikes beiimdeitin bolady. Servis qatysýshylar arasynda kásibi qatynastardy qurýǵa kómektesip, redaktsiialyq saiasatta metrikalardyń keńinen qoldanylýyna jaǵdai jasamaq.
«Chartbeat kompaniiasy qazaqstandyq BAQ-qa búkil álemdegi eń iri redaktsiialarda tabysty túrde qoldanylyp otyrǵan derekterdi taldaý salasyndaǵy ozyq tehnologiialardyń artyqshylyqtaryn qoldanýǵa kómektese otyryp, olarmen jumys jasaýǵa múmkindik alyp otyrǵanyna qýanyshty. Qazirgi tańda jýrnalistika sapasy burynǵydan asa úlken mańyzǵa ie, sondyqtan osy seriktestik aiasynda iri ne shaǵyn bolsyn, 25 basylymnyń árqaisysyna óz oqyrmandaryna erekshe deńgeide áser etýge jáne jumys sapasyn kóterýge kómektespek», - dep atap ótti Djill Nikolson.
Jańa resýrs naqty ýaqyt rejiminde derekter analitikasyn kelesi bes basty kórsetkish boiynsha kórsetedi: saitqa kirýshiler, biregei qoldanýshylar, geoderekter, traffik kózderi, 24 saǵat, 7 kún jáne 30 kún ishindegi eń úzdik jariialanymdar týraly aqparat. Saitqa kirýshilerge qatysýshy portaldar arasynda usynylǵan kórsetkishter boiynsha salystyrmaly analiz jasaý, sondai-aq, bir ai ishindegi analitikany júktep alý múmkindigi qoljetimdi bolmaq.
Aita ketsek, ótken jyldyń tamyzynda redaktsiialar jumysynda onlain metrikalardy jáne Ortaq derekter panelin qoldaný jónindegi joba iske qosyldy. Joba Qazaqstandaǵy AQSh elshiligi arqyly Innovatsiialar qory arqyly qarjylandyrylady. Jobaǵa qatysýshylar Charbeat qyzmetterin bir jyl boiy tegin qoldanýǵa múmkindik alyp otyr. Bul – jobaǵa qatysatyn 25 onlain-mediaǵa derekterdi analitika salasyndaǵy innovatsiialyq quraldarǵa bir jyl boiy tegin qol jetkizýge múmkindik beretin Qazaqstandaǵy tuńǵysh ári jalǵyz joba. Joba Qazaqstandaǵy AQSh elshiligi arqyly Innovatsiialar qory esebinen qarjylandyrylyp otyr. Joba operatory – Qazaqstan Baspasóz klýby. Jobany aiqyn etý jáne onyń júzege asyrylýyna monitoring júrgizý maqsatynda táýelsiz Qamqorshylar keńesin qurý týraly sheshim qabyldandy. Onyń quramyna naqty naryqtyń ókilderi - media sarapshylary jáne IT-tehnologiia salasyndaǵy mamandar kirip otyr. Jobanyń ekinshi jylynda Chartbeat jobanyń birinshi jylyna qatysqan 25 BAQ-qa 70%-dyq shegerimdi usynady.
