Azamattardyń quqyqtaryn qorǵaýdy kúsheitý maqsatynda respýblikada 21 jańa sot qurylady. Bul týraly QR Joǵarǵy soty janyndaǵy Sottardyń qyzmetin qamtamasyz etý departamentiniń basshysy Nail Ahmetzakirov málim etti, dep habarlaidy QazAqparat.
2021 jyldyń shildesinen bastap respýblikada Ákimshilik rásimdik-protsestik kodeks qoldanysqa enedi. Kodeks bilik organdarymen daý-damailardy qaraý barysynda azamattardyń quqyqtaryn qorǵaýdy sapalyq jańa deńgeige shyǵarýǵa baǵyttalǵan.
«Halyqaralyq praktikada jekelegen sottardy qurý modeli ózin-ózi aqtady. Sondyqtan bizde derbes ákimshilik sottar qurylatyn bolady. Olar ákimshilik quqyqbuzýshylyqtar týraly isterdi qaramaidy. Ákimshilik quqyqbuzýshylyqtar týraly kodeks boiynsha jumys istep jatqan sottardyń ataýy 2021 jyldyń 1 shildesinen bastap ózgeredi.
Qazirgi tańda Departament ákimshilik ádilet júiesin engizý boiynsha aýqymdy daiyndyq jumystaryn júrgizýde. 21 jańa ákimshilik sot qurylady, olardyń 17-si – oblys ortalyqtarynda, qosymsha 4-eýi - Qasqeleń, Semei, Jezqazǵan jáne Ekibastuzda ashylady. Jańa sottar qoldanystaǵy shtattyq keste sheńberinde qurylady», - dedi N.Ahmetzakirov.
Sondai-aq málim etilgendei, infraqurylymdy damytý aiasynda Arys aýdandyq, Sátbaev qalalyq jáne Jambyl oblystyq sottary ǵimarattarynyń qurylysy bastaldy. 100 sot ǵimaratyna kúrdeli jóndeý júrgizildi.
