"Qazaqstan atom elektr stantsiialary" JShS bas direktory Timýr Jantikin Qazaqstanda AES qurylysynyń tehnologiialaryn qai kompaniialar jetkize alatynyn aitty.
Timýr Jantikinniń aitýynsha, 2019 jyly Qazaqstan iadrolyq tehnologiialary ozyq sheteldik jetkizýshilerinen birneshe kommertsiialyq usynystar aldy. Nátijesinde Qytai, Ońtústik Koreia, Resei, Frantsiia jáne AQSh-tyń alty jetkizýshisinen 13 zamanaýi reaktor jobasy tańdaldy.
"Usynylǵan tehnologiialardy aldyn ala baǵalaý úshin biz álemdik tájiribe men atom energiiasy jónindegi halyqaralyq agenttiktiń (MAGATE) usynysy negizinde ózimizdiń baǵalaý júiemizdi jasadyq. Keiinnen bul júieni Frantsiianyń áigili Assystem injiniringtik kompaniiasy maquldady", – dedi Jantikin úkimet otyrysynda.
Usynys bildirgen 4 kompaniia:
- HPR1000 reaktory bar qytailyq CNNC kompaniiasy;
- APR1000 jáne APR1400 reaktorlary bar koreialyq KHNP;
- VVER-1200 bar reseilik Rosatom;
- EPR1200 tehnologiiasymen frantsiialyq EDF.
Tehnologiialardan basqa, jobanyń shamamen quny, onyń merzimi, qarjylandyrý ádisteri men kózderi aityldy.
"Referendým qorytyndysy boiynsha oń sheshim qabyldansa, iadrolyq tehnologiianyń jetkizýshisin tańdap, jobanyń tehnikalyq-ekonomikalyq negizdemesin birlesip ázirleimiz. Túsinýi kerek nárse – Qazaqstannyń bolashaǵy atom energetikasymen tyǵyz bailanysty", – dedi Jantikin.
Ol atom elektr stantsiialary álemdegi eń qaýipsiz jáne senimdi energiia kózderiniń biri ekenin aitty.
Tabiǵi-klimattyq faktorlardy, energetikalyq júieniń sipattamalaryn jáne boljamdy elektr energiiasynyń tapshylyǵyn eskere otyryp, sarapshylar kelesi qorytyndyǵa keldi:
- Bir bloktyń usynylatyn qýaty – 1,4 GVt deiin;
- Stantsiianyń jalpy qýaty – 2,8 GVt deiin;
- AES úshin usynylatyn oryn – Almaty oblysy, Úlken aýylynyń janyndaǵy Balqash kóliniń aýdany.
"Barlyq tujyrymdarymyzdy The Japan Atomic Power Company jáne Marubeni Utility Services japoniialyq kompaniialardyń konsortsiýmy rastady", – dedi bas direktor.
Sózinshe, Qazaqstanda atom elektr stantsiialaryn salý úshin usynylatyn ońtaily tehnologiia – qaýipsizdik deńgeii joǵary jáne ekonomikalyq kórsetkishteri jaqsarǵan III jáne III+ býyn qysymdy sý reaktorlary.
Eske salaiyq, úkimet AES qurylysy boiynsha referendým ótkizý týraly qaýly jobasyn maquldady.
