Qazaqstanda ádebi aýdarma sátti jolǵa qoiylýy úshin eń aldymen ádebi agent júiesin iske qosý kerek. Bul týraly jazýshy Smaǵul Elýbai Halyqaralyq jazýshylar forýmynda aitty, dep habarlaidy QazAqparat.
Belgili jazýshy Smaǵul Elýbaidyń aitýynsha, aýdarmashy avtordyń obalyna qalmaýy kerek. Ol úshin ádebi agent júiesin iske qosý qajet. Qazirgi zamanda onsyz ádebiettiń mańdaiy jaryq bola qoimaidy. Ádebi shyǵarmanyń ózge tilge aýdarylýy óte kúrdeli problema.
«Meniń «Aqboz úi» romanym ispan tiline aýdaryldy. Oǵan bárimiz qýandyq. Keiin sol eldiń shyǵarmashylyq adammymen kezdesip, kitapty kórsettim. Sonda ol maǵan «óte nashar aýdarma» dedi. Qýanyshym sý sepkendei basyldy. Onymen kim ainalysqanyn bilmedim. Aty-jóninen de, qandai shyǵarmalar aýdarǵanynan da habarsyzbyn. Árbir elde ádebi agent degen bolady. Olar bárin qadaǵalap otyrady: kitapty qalai taratý kerek, qai baspadan shyǵarý kerek, qai aýdarmashyǵa berý kerek. Osynyń bárin óz moinyna alady», - deidi Smaǵul Elýbai.
Onyń aitýynsha, damyǵan elderdiń bárinde jazýshy men baspa arasyndaǵy dáneker rólin agentter atqarady. Jazýshylar úiinde otyryp jazýmen ǵana ainalysady.
«Muny aityp otyrǵan sebebim – aýdarmany da qadaǵalaityn sol ádebi agentter. Ózine paida túsetin bolǵandyqtan avtormen birdei jany ashidy, tabanynan taýsylǵansha júgiredi.Sol júieni qolǵa almaiynsha aýdarma isine kúmánmen qarap otyra beremiz», - dedi jazýshy.
Buǵan deiin, Memleket jáne qoǵam qairatkeri Oljas Súleimenov,qazaq jazýshylarynyń shyǵarmalaryn úzdik mamandar aýdarý kerektigin aitqan bolatyn.
Eske sala ketsek, Almatyda halyqaralyq jazýshylar forýmy ótip jatyr. Oǵan 18 memleketten 81 delegat qatysýda.
