Qazaqstanda 2018-2020 jyldary aralyǵynda adam saýdasyna qatysty 1 100-ge jýyq qylmys tirkeldi. Bul týraly QR Prezidenti janyndaǵy Adam quqyqtary jónindegi komissiia hatshysy Tastemir Ábishev aitty, dep habarlaidy QazAqparat.
«Adam quqyqtaryn buzýdyń eń jaman túriniń biri – adam saýdasy. Ózderińiz biletindei, tabys tabý jaǵynan adam saýdasy zańsyz biznestiń ishinde úshinshi orynda tur. Birinshisi - zańsyz qarý-jaraq satý, ekinshisi - zańsyz esirtki saýdasy. BUU Kóshi-qon komitetiniń esebine sáikes, adam saýdasymen ainalysatyndar jyl saiyn 150 mlrd dollardan astam tabys tabady eken. Qazaqstanda da adam saýdasynyń aldyn alý jáne olarmen kúres joldaryn jetildirý úshin, sonymen qatar adam saýdasy qurbandaryna ataýly áleýmettik kómek kórsetýdi jaqsartý úshin QR Prezidenti janyndaǵy Adam quqyqtary jónindegi komissiia memlekettik organdarmen, daǵdarys ortalyqtarymen, memlekettik emes uiymdarmen birlesip, arnaýly baiandama daiyndady. Bul baiandama negizinen Prezident Qasym-Jomart Toqaevtyń 2020 jylǵy 1 qyrkúiektegi Joldaýynda jáne 2020 jylǵy 22 qazandaǵy Ulttyq qoǵamdyq senim keńesiniń otyrysynda bergen tapsyrmalaryn oryndaý úshin ázirlendi», - dedi ol atalǵan komissiia otyrysy aldynda BAQ ókilderine bergen suhbatynda.
Onyń aitýynsha, elimizde adam saýdasy qurbandaryna 2016 jyldan bastap ataýly áleýmettik kómek kórsetiledi. Biraq, ol kómek tek Qazaqstan azamattaryna, elimizdi turǵylyqty turyp jatqan sheteldik azamattarǵa, qandastarǵa jáne azamattyǵy joq adamdarǵa ǵana beriledi. Al elimizge birneshe aiǵa ýaqytsha kelgen eńbekshi migranttar adam saýdasynyń qurbany bolǵan jaǵdaida eshqandai ataýly kómek ala almaidy.
«Bul, árine, halyqaralyq standarttarǵa sai kelmeidi. Qazaqstan 2008 jyly Polermo hattamasyn ratifikatsiialaǵan. Sol Polermo hattamasyna sáikes, oǵan qatysýshy árbir memleket elinde turyp jatqan óziniń azamattaryna, ýaqytsha nemese turǵylyqty turyp jatqan sheteldik azamattarǵa múmkindiginshe arnaýly áleýmettik kómek kórsetýi qajet. Statistika boiynsha 2018, 2019 jáne 2020 jyldary adam saýdasyna bailanysty 1 100-ge qylmys tirkelgen. Degenmen, mundai qylmys jyldan jylǵa az tirkele bastady. Atalǵan qylmystarǵa bailanysty 242 adam sottaldy. Bul da tómendep keledi», - dedi Tastemir Ábishev.
