Elimizde adam quqyqtaryn qorǵaýǵa arnalǵan Birikken Ulttar Uiymy keńesiniń usynymdarynyń júzege asý barysy aityldy, dep habarlaidy QazAqparat.
«Ámbebap kezeńdik sholý - adam quqyqtary men bostandyqtary salasyndaǵy mindettemeler men mindetterdiń oryndalýyn baǵalaýdyń biregei tetigi. ÁKSh (Ámbebap kezeńdik sholý) 2008 jyldan bastap BUU Adam quqyqtary jónindegi keńesiniń jumysy sheńberinde jumys isteidi. Ondaǵy maqsat - eldegi adam quqyqtaryn qorǵaý men kótermeleýdi jaqsartý boiynsha qabyldanǵan sharalar týraly habardar etý», - dedi QR Ádilet vitse-ministri Aqerke Ahmetova OKQ-de ótken baspasóz máslihatynda.
Ministr orynbasarynyń sózinshe, keńestiń quramy ádil geografiialyq bólý qaǵidaty boiynsha aiqyndalady.
«Ózderińiz biletindei, Qazaqstan 1992 jyldan bastap BUU-nyń múshesi. ÁKSh aiasyndaǵy bizdiń elimizdiń úshinshi sholýy 2019 jyldyń qarasha aiynda ótti. Birinshi sholý 2010 jyly, sodan keiin 2014 jyly ótti. Sholýdyń máni eldiń jazbasha baiandamasyn aldyn ala usyný, BUU-ǵa qatysýshy memleketterdiń suraq-jaýaptary men túsindirmeleri formatyndaǵy interaktivti dialog bolyp tabylady. Dialog qorytyndysy boiynsha elge joldanatyn usynymdar qabyldanady. Elde alynǵan usynystardy oryndaý quraldary men ádisterin óz betinshe tańdaý quqyǵy saqtalady», - deidi ol.
Sonymen qatar, A. Ahmetova 2019 jylǵy 20 jeltoqsanda atalǵan keńes Qazaqstanǵa qatysty tiisti qujatty qabyldaǵanyn málim etti.
Onda Qazaqstannyń atyna 245 usynym kelip túsken. Ol týraly keńestiń saitynda tanysýǵa bolady jáne usynymdardy oryndaý merzimi – 2024 jylǵa deiin.
«Qazaqstan áielderdiń, balalar men múgedekterdiń quqyqtaryn qamtamasyz etý, salaýatty orta, otbasy, balalyq shaq institýtyn qoldaý jáne taǵy sol siiaqty usynymdardyń 87%-yn (214 usynym)qoldady. Usynymdar azamattyq qoǵamnyń qatysýymen qaraldy jáne ótken jyldyń maýsym aiynda olardy iske asyrýdyń 2020-2024 jyldarǵa arnalǵan vedomstvoaralyq jospary bekitildi. Jáne ol 18 bólimnen turyp, jalpy sany 77 is-sharany qarastyrady. Azamattyq qoǵammen usynymdardy iske asyrý barysyn talqylaý turaqty negizde júrgiziledi. Búgingi tańda 214 usynystyń azamattyq qoǵam kótergen ózekti máseleler boiynsha 20% oryndaldy dep aitýǵa bolady. 80% boiynsha belsendi jumys júrgizilýde», - dedi ministr orynbasary.
