Mádeni-aǵartý baǵytyndaǵy «Abai» telearnasynyń tusaýy kesildi, dep habarlaidy QazAqparat.
«Álemde qalyptasqan kúrdeli ahýalǵa qaramastan 2020 jyl elimizdegi erekshe mańyzdy oqiǵalarmen este qalatyndyǵy anyq. Sonyń biri - Abaidyń 175 jyldyǵy. Biyl uly aqynnyń murasyn dáripteýge arnalǵan aýqymdy jumystar bastaldy. Is-sharalar áli de jalǵasyp jatyr. Bul - barymyzdy baǵalaityn, bolashaǵymyzdy baǵdarlaityn naqty qadam bolyp otyr. Elbasymyz Nursultan Nazarbaevtyń «Rýhani jańǵyrý» baǵdarlamasynda kórsetilgen qoǵamdyq sanany qaita túletý isiniń mán-mańyzy osynda. Memleket basshysy Qasym-Jomart Toqaev «Abai jáne HHI ǵasyrdaǵy Qazaqstan» atty maqalasynda «aqynnyń murasy búkil adamzat balasynyń rýhani azyǵy» dep laiyqty baǵa berdi», - dedi telearnanyń ashylý saltanatyna qatysqan QR Prezidenti Ákimshiligi basshysynyń birinshi orynbasary Dáýren Abaev.
Onyń atap ótýinshe, búgin tusaýy kesiletin jańa telearna mádeni-aǵartýshylyq salaǵa úles qosyp, ult qazynasyn toltyrýdy kózdeidi.
«Jańa arnanyń «Abai» dep atalýy tegin emes. Birinshiden, mádeni-aǵartý baǵytyndaǵy jalǵyz telearnaǵa ult rýhaniiatynyń temirqazyǵy Abaidyń atyn berý óte oryndy. Óitkeni, uly aqynnyń ónegeli joly áli talai ǵasyrǵa jalǵas ady. Ekinshiden, jańa telearna tól mádenietimiz ben dástúrimizdi nasihattaýdy maqsat etedi. Bul týrasynda uly oishyldyń «Paida oilama ar oila, talap qyl artyq bilýge», «Ásempaz bolma árnege, ónerpaz bolsań arqalan» degen ósietterin este ustaýymyz kerek... Uly aqyn taǵy bir sózinde adam balasyn zaman ósiredi deidi. Bizdiń jańa telearnamyzdyń jumysy da osy qazirgi dáýirdiń talabyna beiimdeledi», - dedi Dáýren Abaev.
Aita keteiik, telearnanyń ashylý sharasyna QR Aqparat jáne qoǵamdyq damý ministri Aida Balaeva, Mádeniet jáne sport ministri Aqtoty Raiymqulova, kórnekti mádeniet jáne óner qairatkerleri, Parlament depýtattary qatysty.
