QR Aýyl sharýashylyǵy vitse-ministri Jeńis Óserbai astyq pen un óndirisi týraly aityp berdi, dep habarlaidy QazAqparat.
«Ulttyq statistika biýrosynyń resmi derekterine sáikes, 2022 jylǵy 1 naýryzdaǵy jaǵdai boiynsha respýblikada 9,1 mln tonna dándi jáne dándi-burshaqty daqyldardyń qory bar. Respýblika boiynsha barlyǵy 7,4 mln tonna bidai, 1,1 mln tonna arpa, 144 myń tonna júgeri dáni jáne 22,9 myń tonna qara bidai bar. Azyq-túlik bidaiynyń qorlary ishki tutyný úshin de, qazirgi marketingtik maýsymnyń sońyna deiin eksportqa jóneltý úshin de jetkilikti», - dedi spiker Ortalyq kommýnikatsiialar qyzmetinde ótken baspasóz máslihatynda.
Buǵan deiin Jeńis Óserbai eldegi áleýmettik mańyzy bar azyq-túlik qory týraly aityp bergen edi.
Ákimdikterdiń jedel derekterine sáikes, 12 naýryzdaǵy jaǵdai boiynsha respýblikada barlyǵy 1,3 mln tonna áleýmettik mańyzy bar azyq-túlik bar.
Onyń ishinde un – 144 myń tonna, qant – 90 myń tonna, kúrish – 39,3 myń tonna, makaron – 21 myń tonna jáne shamamen 900 myń tonna kókónis ónimderi jáne basqalary bar.
Sonymen birge, Qazaqstanda shamamen 90 myń tonna qant qory bar jáne respýblika qantpen tolyq qamtamasyz etilgen.
