Qazaqstanda 80-nen astam sheteldik telearnalardyń tirkeý týraly kýálikteri qaitarylyp, el aýmaǵynda habar taratýy toqtatyldy, dep habarlaidy "Ult aqparat" QR Aqparat jáne kommýnikatsiialar ministrliginiń baspasóz qyzmetine silteme jasap.
Oǵan sheteldik telearnalardyń Qazaqstan zańnamasyna engen talaptardy oryndamaýy sebep bolyp otyr.
Tyiym salynǵan uiymdar arasynda MUSICBOX, Dojd, Fashion TV, Fox News Channel, THT-Comedy syndy tanymal oiyn-saýyq telearnalary bar.
«Qazir Qazaqstanda 306 sheteldik tele-radio arna tirkeýde tur. Olardyń qyzmetin retteý maqsatynda ministrlik jyl basynda zańnamaǵa túzetýler engizdi. Oǵan sáikes, sheteldik arnalar Qazaqstan Respýblikasynda óz ókildigin ashýy mindetteldi. Barlyq talaptardy oryndaý úshin jarty jyl ýaqyt ta berildi. Qazirgi ýaqytta 219 telearna tiisti talaptardy oryndady. Ministrlik qalǵan 88 arnanyń el aýmaǵynda habar taratýyn toqtatýdy qarastyratyn buiryq ázirledi», - dep jazdy QR Aqparat jáne kommýnikatsiialar ministri Dáýren Abaev Facebook-te.
«Teledidar jáne radio habarlaryn taratý týraly» QR Zańyna (18-1-bap) el aýmaǵynda habar taratyn barlyq sheteldik tele jáne radioarnalardyń ókildik ashý mindettemesi 2017 jyly engizilgen.
Atalǵan Zań 2018 jyldyń 9 qańtarynda kúshine engen jáne sheteldik tele-radioarnalar QR aýmaǵynda zańdy tulǵany nemese ókildigin (filialyn) 2018 jyldyń 9 shildesine deiin tirkeýge mindetti bolǵan.
Belgilengen merzim aiaqtalǵan soń ministrlik zańdy tulǵany nemese ókildigin (filialyn) tirkemegen barlyq sheteldik tele jáne radioarnalardyń tirkeý kýálikterin qaitarý týraly sheshim shyǵardy. Bul óz kezeginde atalǵan tele jáne radioarnalardyń QR aýmaǵynda habar taratý quqyǵyn joiady.
Ministrliktiń habarlaýynsha, Qazaqstan aýmaǵynda habar taratýyn jalǵastyrǵysy keletin sheteldik tele jáne radioarnalar óz ókildikterin ashyp, qaitadan tirkeýge turýy qajet.
Qazaqstan Respýblikasy aýmaǵynda óz ókildikterin ashpaǵan 88 telearnanyń tizimi ministrlik saitynda jariialanǵan.
