Qazaqstanda koronavirýske shaldyqqandardyń 70 paiyzynda aýrý simptomy baiqalmaǵan. Bul týraly QR Densaýlyq saqtaý ministri Eljan Birtanov aitty, dep habarlaidy "Ult aqparat".
«Naýqastardyń arasynda aýyrǵan, simptommen kelgen adamdardyń sany 15-16 paiyz kóleminde. Al 70 paiyz naýqas simptomsyz tirkelgen. Sebebi bul naýqastardy tabý úshin Densaýlyq saqtaý ministrligi jáne jergilikti ákimshilikter aldyn alý skriningin ótkizip jatyr. Prezidenttiń tapsyrmasy boiynsha qazirgi kúni skriningtiń kólemin táýligine 25 myń testke arttyrdyq. Bastapqy kezde kúnine 3-4 myń ǵana bolǵan edi. Jalpy osy epidemiia bastalǵannan beri elimizde 711 myń test ótkizildi. Olardyń 260 myńnan astamy, iaǵni 40 paiyzyn aldyn alý skriningi dep aitýǵa bolady», - dedi ministr Ortalyq kommýnikatsiialar qyzmetindegi brifing barysynda.
Ministr úlken ujymdarda, meditsinalyq mekemelerde, áleýmettik uiymdarda skrining ótkizilip, biraz naýqastyń tabylǵanyn jáne olar oqshaýlandyrylǵanyn atap ótti.
«Bul - óte mańyzdy másele. Árine, kóp jaǵdaida azamattar: «Men aýyrmaimyn, eshqandai simptomy joq. Nege meni karantinge nemese aýrýhanaǵa jatqyzady?» dep surap jatyr. Onyń sebebi - osyndai simptomsyz aýrýlar basqa azamattarǵa infektsiiany juqtyrýy múmkin. Ol belgili jaǵdai. Dúniejúzinde densaýlyq saqtaý uiymynyń keńesi boiynsha, basqa da ǵylymi zertteý jumystarynyń negizinde simptomsyz azamattardy oqshaýlaýǵa jiberýimiz qajet. Buryn biz olardy aýrýhanaǵa jatqyzǵanbyz. Qazir múmkindik bolsa úilerinde nemese arnaiy karantindik statsionarlarǵa jatqyzyp, basqa adamdardan bólekteýimiz qajet», - dedi ol.
Onyń atap ótýinshe, keibir memlekette bul simptomsyz naýqastardy esepke almaidy. Jalpy statistikaǵa kirgizbeidi.
«Biz bul durys emes dep oilaimyz. Qazaqstanda barlyq tirkelgen naýqastardy, juqtyrǵan naýqastardy esepke kirgizip, sanaimyz. Qazir naýqastardyń ósimin kórip otyrmyz. Onyń sebebi - aldyn alý. Juqtyrǵan azamattardy taýyp, oqshaýlaýǵa jibersek, bul indetti toqtatýǵa múmkindik bar», - dedi Eljan Birtanov.
