Turǵyn úi jaldaý aqysyn biýdjet esebinen sýbsidiialaý sharasy 10 jylda 500 myńnan astam qazaqstandyqtyń baspana máselesin sheshedi. QR Úkimet basshysy Álihan Smaiylov Úkimet otyrysynda osyndai málimet keltirdi, dep habarlaidy QazAqparat.
«Azamattardyń ál-aýqatyn jaqsartý memlekettik saiasattyń eń mańyzdy mindeti bolyp tabylady. Osy mindetke jetýdiń basym baǵyttarynyń biri – ol turǵyn úidiń qoljetimdi bolýy. Jalpy qurylys salasy jyl saiyn oń dinamika kórsetip, ósip keledi. Ótken jyldyń qorytyndysy boiynsha 17,1 mln sharshy metr úi salyndy. Turǵyn úi qurylysyna shamamen 2,4 trln teńge investitsiia tartyldy. Soǵan qaramastan, qarapaiym azamattardyń basym bóliginiń baspanaǵa qoly jetpei júr», - dedi Úkimet basshysy.
Onyń sózine qaraǵanda, jyl saiyn úi kezegine turǵandardyń sany kóbeiip jatyr.
«Osyǵan orai Memleket basshysynyń tapsyrmasy boiynsha turǵyn úi saiasatynyń jańa tásilderi ázirlendi.
Munda «Otbasy bankke» erekshe rol beriledi. Ol baspanaǵa muqtaj adamdardyń kezegin qalyptastyrý jáne olarǵa jeńildikti turǵyn úilerdi satý boiynsha biryńǵai operator bolady», - degen Álihan Smaiylov azamattarǵa úi satyp alý úshin zeinetaqy jinaqtarynyń bir bóligin «Otbasy bankindegi» depozitterge salý múmkindigi berilgenin eske saldy.
«Zańnamany reformalaý aiasynda turǵyn úidi kirisine qarai satý, arendalyq tólemderdiń bir bóligin sýbsidiialaý jáne aýyldy jerlerde turǵyn úi salý mehanizmderi engiziledi.
Sonymen qatar, Memleket basshysynyń tapsyrmasyna sáikes, arendalyq tólemniń bir bóligin sýbsidiialaý mehanizmin engizý týraly sheshim qabyldandy.
Shamamen baspanaǵa muqtaj 70 myńnan astam otbasy osy mehanizmmen qamtylady. Olar jaldaý aqysynan únemdelgen qarajatty úi satyp alýǵa jinai alady.
Jalpy jańa tásilder 10 jyl ishinde turǵyn úi kezeginde turǵan jarty millionnan astam adamnyń baspana máselesin sheshýge jáne memlekettik qoldaýdyń ádiletti, ashyq ári qoljetimdi júiesin jasaýǵa múmkindik beredi», - dedi Premer-Ministr.
