Zańǵa qaishy áreket jasaǵan 70 myń qazaqstandyq ishki ister organdarynyń esebinde tirkeýde tur. Bul týraly QR IIM baspasóz hatshysy Áigerim Orazálieva málim etti, dep habarlaidy QazAqparat.
«7-13 aqpan aralyǵynda «Profilaktikalyq baqylaý» atty respýblikalyq jedel profilaktikalyq shara ótti. Osy ýaqyt aralyǵynda ishki ister organdarynyń esebinde turǵan 70 myń azamat turǵyn meken-jaiy boiynsha tekserildi. Onyń ishinde 5 myń merziminen buryn shartty túrde bosatylǵan azamat bar, 1 myń azamatqa ákimshilik baqylaý bekitilgen jáne jazasyn qoǵamnan alshaqtamai óteý belgilengen 20 myń azamat bar. Jedel shara nátijesinde 2 myńnan astam adamnyń zań buzǵany anyqtaldy jáne 4 azamatqa qatysty ákimshilik baqylaýǵa baǵynbaǵany úshin sotqa deiingi tergeý amaly júrip jatyr», - dedi Áigerim Orazálieva ministrlikte onlain ótken baspasóz máslihatynda.
Sondai-aq, brifing barysynda azamattardyń teris qadamǵa barý sebepteri aityldy.
«Sot sheshimine sáikes zańdy buzǵan merziminen buryn shartty túrde bosatylǵan 19 adam keri qaitaryldy. Sonymen qatar ishki ister organdarynyń tirkeýinde turǵan 76 azamattyń qaida júrgeni anyqtaldy. Adamdardyń quqyq buzýynyń negizgi sebepteri, ishimdik ishý, jumyssyzdyq, quqyqtyq saýatynyń tómendigi jáne bolǵan isten sabaq almaý. Osy oraida máseleni sheshý jolynda ishki ister organdarynyń mamandarymen qatar jergilikti atqarýshy organdardyń, úkimettik emes uiym jáne qoǵamdyq uiymdardyń ókilderi iske tartyldy», - deidi ol.
Onyń aitýynsha, 600 sottalýshyny eńbekpen qamtý úshin halyqty áleýmettik qorǵaý bóliminde resmi hat jiberildi.
