Qazaqstanda da Jeńis kúnine arnalǵan sherý bolmaidy. Al Otan qorǵaýshylar kúnine arnalǵan sharalardyń basym bóligi onlain formatta ótedi, dep habarlaidy "Ult aqparat" QR Qorǵanys ministrligine silteme jasap.
QR Qorǵanys ministrligi Tárbie jáne ideologiialyq jumystar departamentiniń ókili, polkovnik Vitalii Adamovich merekege orai qalalar men óńirlerde shaǵyn sherýler uiymdastyryla ma degen suraqqa jaýap berdi.
«Árine, Qarýly Kúshter ardagerlerine qurmet kórsetý sanitarlyq-epidemiologiialyq talaptardy eskere otyryp, elimizdiń barlyq óńirlerinde ótedi. Iaǵni, is-sharalar negizinen onlain formatta ótedi. Oǵan qosa bizdiń «Jas sarbaz» qozǵalysy birqatar sharalar josparlap otyr. Jas patriottar da Qarýly Kúshterdiń ardagerlerin quttyqtaidy. Ár óńirdiń epidemiologiialyq jaǵdaiy (qyzyl, sary, jasyl aimaqtar) múmkindik berse, tiisti saltanatty jinalystar ótkizilip, ardagerler áskeri bólimderge shaqyrylady, onda qyzmet etý tájiribesi týraly aitady. Negizgi uiymdastyrylatyn is-sharalar osy», - dedi Vitalii Adamovich vedomstvonyń onlain-brifinginde.
Spiker merekelik is-sharalar áleýmettik jelilerden kórsetile me jáne olardy qazaqstandyqtar kóre ala ma degen suraqqa da jaýap berdi.
«7 mamyr jáne Uly Otan soǵysyndaǵy Jeńis kúni – barlyq qazaqstandyqtar úshin aitýly kúnder. Árine, biz respýblikalyq telearnalarda da, Qorǵanys ministrliginiń Youtube-arnasynda da, «Jas sarbaz» qozǵalysynyń Youtube-arnasynda jáne basqa da áleýmettik jelilerde birqatar kórsetilim josparladyq. Biz Qarýly Kúshterdiń ardagerleri men Uly Otan soǵysynyń ardagerlerine qurmet kórsetý úshin ótkiziletin barlyq sharalardy kórsetýge tyrysamyz», - dep atap ótti Adamovich.
Sonymen birge, qazaqstandyqtar 7 mamyrda saǵat 15.30-da «Habar» telearnasynan kórsetiletin merekelik baǵdarlamany tamashalai alady.
