Qazaqstanda 52 mlrd teńgeniń 43 jobasy aiaqtalmai qalǵan. Bul týraly Parlament Senatynda respýblikalyq biýdjettiń atqarylýyn baqylaý jónindegi esep komitetiniń tóraǵasy Natalia Godýnova málim etti, dep habarlaidy QazAqparat.
«Biyl tiimdilik prizmasy arqyly memlekettik resýrstardy shyǵyndaý máselesin pilottyq rejimde tekserip kórdik. Salynǵan memlekettik investitsiialardyń ekonomikalyq tiimdiligine taldaý júrgizildi. Naqtyraq aitqanda ekonomikanyń damýyna tikelei yqpal etetin shyǵyndar baǵalandy. Bul tek damý biýdjeti ǵana emes, kapitaldyq shyǵyndar men sýbsidiialaýlar, nesieleýler. 2019 jyly mundai shyǵyndardyń mólsheri respýblikalyq biýdjettiń jalpy 14 paiyzyn qurady. Dál osy jinaq ekonomikanyń ósimi úshin resýrstardy túrlendirýge múmkindik beredi», - dedi Natalia Godýnova.
Esep komitetiniń aitýyna qaraǵanda shyǵyndar qurylymyndaǵy kólemniń 14 paiyzynyń ishinde qurylys salasyna, maqsatty transfertke resýrstyń 40 paiyzy jumsalǵan.
«Sonymen birge halyq úshin mańyzy bar bastalyp qoiǵan, alaida aiaqsyz qalǵan ártúrli jobalar qordalanyp qaldy. Ákimdiktermen birlese otyryp 52 mlrd teńgelik dál osyndai 43 jobany sanap shyqtyq. Shyǵyn shyqqanymen ol jobalardyń keibiri aiaqtalmaityn da sekildi. Jeke jobalar boiynsha kei merzim 5 jylǵa deiin sozylyp ketken. Qai óńirde qandai nysandar týraly áńgime aitylyp otyrǵanyn bári de biledi. Álbette ol jobalardy aiaqtaýǵa qosymsha qarajat kerek. Al aimaqta ol soma joq. Bul fakttar Memleket basshysynyń áleýmettik-ekonomikalyq tiimdiligine ie jobalardy qarjylandyrý týraly tapsyrmasyna qarama-qaishy keledi», - dedi Natalia Godýnova.
