Qazaqstanda paidalanylmai jatqan aýyl sharýashylyǵy jerlerin memleket menshigine qaitarý kólemin tórt esege ulǵaitý josparlanyp otyr, - dep habarlaidy "Ult aqparat" Úkimet saityna silteme jasap.
Premer-ministr Álihan Smaiylov jer qatynastaryn tsifrlandyrý máseleleri boiynsha keńes ótkizgen, onda aýyl sharýashylyǵy jerlerin paidalanýdyń ǵaryshtyq monitoringi jáne olardy tsifrlandyrý máseleleri qaraldy.
Baiandama jasaǵan aýyl sharýashylyǵy ministri Erbol Qarashókeev qazir "Qazaqstan Ǵarysh Sapary" UK" AQ bazasynda aýyl sharýashylyǵy jerlerine ǵaryshtyq monitoring jasaýdyń jetildirilgen nusqasyn engizý pysyqtalyp jatqanyn málimdedi.
"Jer inspektorynyń kabineti" jasalǵan, ol ár jerden alynǵan derekterdi taldap, jer ýchaskesin utymsyz paidalaný belgilerin anyqtaýǵa jáne osyndai faktilerge jedel jaýap qaitarýǵa múmkindik beredi. Bul platforma 2022 jyldyń jazynda iske qosylady.
"Memlekettik baqylaý ádisteriniń pysyqtalýyn eskere otyryp, biyl memleketke qaitarylǵan paidalanylmaityn aýyl sharýashylyǵy jerleriniń aýdanyn ótken jylmen salystyrǵanda 4 esege ulǵaitý josparlanyp otyr: 2021 jyly 1,3 million gektar qaitaryldy, 2022 jyly keminde 5 million gektar qaitarý josparda bar", - delingen habarlamada.
Sonymen qatar ministr aýyl sharýashylyǵy jerleriniń bárin tsifrlandyrý aiaqtalǵannan keiin ǵaryshtyq monitoringtiń tiimdiligi jaqsaratynyn atap ótti. Bul protsesti 2024 jyly aiaqtaý josparlanyp otyr.
Premer-ministr aitylǵan tásilderdi qoldap, osy baǵyttaǵy jumysty jedeldetýdi tapsyrdy.
