Ishki ister ministrligi azamattyǵy anyqtalmaǵan adamdardy anyqtaý jáne qujattandyrý naýqany kezinde 4 686 turǵynnyń qujatsyz kúneltip júrgenin anyqtady, dep habarlaidy "Ult aqparat".
2020 jyldyń qyrkúiek aiynan bastap mamyr aiyna deiin Ishki ister ministrligi «Adam quqyqtarynyń zańdylyǵyn saqtaý jónindegi halyqaralyq biýro» jáne «Sana Sezim» áielder bastamalarynyń quqyqtyq ortalyǵy» aktsionerlik qoǵamymen birlesip azamattyǵy anyqtalmaǵan adamdardy anyqtaý jáne qujattandyrý boiynsha aýqymdy sáikestendirý naýqanyn júrgizgen bolatyn.
Kóshi-qon qyzmeti komitetiniń bólim basshysy Ǵani Shymyrbaev osy naýqannyń alǵashqy qorytyndysyn jariialady.
«Aktsiianyń maqsaty – Qazaqstan Respýblikasynyń aýmaǵynda qujatsyz nemese 1974 jylǵy úlgidegi KSRO pasportymen turatyn adamdar ishki ister organyna júginýge quqyly ekenin qoǵamǵa jetkizý. Qujatsyz adamdardyń kóbi TMD elderden jaramsyz pasporttarmen kelgen nemese 1974 jylǵy úlgidegi KSRO pasport ieleri», - deidi Ǵani Shymyrbaev.
Naýqan nátijesinde 4 686 qujatsyz adam anyqtalǵan. Olardyń kópshiligi – Almaty (599), Qaraǵandy (541), Túrkistan (426) Aqmola (326), Jambyl (350) jáne oblystarynda turady. Onyń ishinde 2 431 adamǵa QR azamatynyń qujaty, 977 tulǵaǵa azamattyǵy joq adamnyń kýáligi berildi. Keiin olar azamattyq ta alady.
«Qujatsyz turatyn adamdardy anyqtaý boiynsha Úkimettik emes uiymdarmen birlesken naýqan jumysy aiaqtalǵanyna qaramastan, aýmaqtardaǵy kóshi-qon qyzmeti bólinisteri qujattandyrý jumysyn turaqty negizde júrgize beredi», - dedi Ǵani Shymyrbaev.
