QR Aýyl sharýashylyǵy ministrliginiń baspasóz qyzmeti Qazaqstanda maqta jinaý naýqany aiaqtalǵanyn habarlady.
Baspasóz qyzmetiniń málimetterine qaraǵanda, qazirgi ýaqytta elimizde 316 myń tonna shitti maqta jinaldy, bul josparlanǵan kólemniń 95%.
Ortasha ónimdilik gektaryna 24,3 ts qurady, ónimniń 84%-y kombaindardyń kómegimen jinaldy.
Ónimdilik boiynsha Túrkistan oblysynyń Ordabasy (30,2 ts/ga) jáne Maqtaaral (25,0 ts/ga) aýdandary kósh bastap tur.
Sharýalar ósirilgen jáne jinalǵan ónimdi 18 maqta óńdeý zaýytynyń 166 qabyldaý pýnktine ótkizip jatyr.
Aita ketý kerek, biyl ártaraptandyrýǵa bailanysty maqta daqyldaryna arnalǵan egis alqaptary 5,5 myń gektarǵa azaidy. Nátijesinde kólem 131,2-den 125,8 myń gektarǵa deiin qysqardy. Bul baǵanyń ósýine yqpal etti. Qazir shitti maqta tonnasyna orta eseppen 160-165 myń teńgeden qabyldanýda. Bul ótken jylǵy kórsetkishpen salystyrǵanda 25%-ǵa joǵary.Byltyr 130 myń teńgeden baǵalanǵan bolatyn.
Baǵanyń ósýi maqta ósirýmen ainalysatyn 125 myń qazaqstandyqtyń áleýmettik-ekonomikalyq jaǵdaiyn jaqsartýǵa múmkindik berdi.
Buryn habarlanǵandai, maqta sharýashylyǵyn qoldaý úshin memleket aǵymdaǵy jyly tómendetilgen baǵamen 76 myń tonnadan astam janar-jaǵarmai, sondai-aq myń tonna tuqym, 80 myń tonnaǵa jýyq mineraldy tyńaitqyshtar, 183 myń litr pestitsidter jáne ziiankesterge qarsy qoldanylatyn 207 myń birlik bioagentter bóldi.
Jalpy alǵanda, 2020 jyly QR Úkimeti men Aýyl sharýashylyǵy ministrligi 30 myń aýyl sharýashylyǵy óndirýshilerine qoldaý kórsetti. Sonymen qatar, jalpy quny 6 mlrd teńge bolatyn 891 aýyl sharýashylyǵy tehnikasy úshin 1,2 mlrd teńge investitsiialyq sýbsidiia tólendi.
