Elimizde 9 myńnan asa otbasylyq qosalqy sharýashylyqty biriktiretin 280 aýyl sharýashylyǵy kooperativi qurylady. Bul týraly Senatta «Halyqtyń tabysyn arttyrýdyń 2025 jylǵa deiingi baǵdarlamasy» keshendi josparyn iske asyrýdy talqylaý kezinde Premer-Ministrdiń orynbasary Eraly Toǵjanov málim etti, dep habarlaidy QazAqparat.
«2025 jylǵa deiin halyqtyń taýar satyp alý múmkindigin qorǵaý maqsatynda qanttan basqa azyq-túlik taýarlary boiynsha 100% importty almastyrý sharalary iske asyrylady. Bul iri 87 sút-taýar fermasyn, 14 et kombinatyn, 17 qus fabrikasyn iske qosý jáne 6,6 myń gektar baq pen bir qant zaýytyn (Pavlodar) salý arqyly júzege asyrylady», - dedi Toǵjanov.
Sonymen qatar ol baqsha, sút, bal ónimderin óndiretin 9 myńnan asa otbasylyq qosalqy sharýashylyqty biriktiretin 280 aýyl sharýashylyǵy kooperativin qurý josparlanyp otyrǵanyn aitty.
«Jalpy joǵaryda atap ótkenimdei, 2025 jylǵa deiin 450 myńnan asa jumys oryndaryn qurý josparlanǵan agroónerkásip salasyn damytý «Aýyl amanaty» jobasy aiasynda iske asyrylady. Bul rette otbasylyq sharýashylyqty damytý boiynsha Jambyl oblysynda tiimdi iske asyrylǵan pilotty jobany elimizdiń basqa aimaqtaryna taratý jumystary júrgizilip jatyr. Qanatqaqty joba 2019 jyldan beri 11 aýyldyq okrýgte iske asyryldy. Nátijesinde, jobaǵa qatysqan 2,5 myń otbasynyń tabysy 4 esege artqan. Bul aýyldardaǵy ataýly áleýmettik kómek alýshylar sany 65%-ǵa azaiǵan. Kásipkerler sany 966-dan 3248-ge deiin ósken, iaǵni árbir úshinshi otbasy kásipkerlikpen ainalysyp otyr. Qazir 11 aýyldan túsetin jyl saiynǵy salyq túsimderiniń kólemi 125 mln teńgege jetti», - dedi Úkimet basshysynyń orynbasary.
