Foto: Pexels.com
Qazaqstanda Memleket basshysynyń tapsyrmalary aiasynda kásipkerlikti damytýǵa jáne biznes júrgizý sharttaryn jeńildetýge baǵyttalǵan júieli sharalar qolǵa alynýda. Bul týraly Úkimet otyrysynda Premer-ministr Oljas Bektenov málimdedi, dep habarlaidy Ult.kz.
Úkimet basshysynyń aitýynsha, búginde elde 2,2 millionnan astam shaǵyn jáne orta biznes (ShOB) sýbektisi jumys isteidi. Atalǵan salada 4 millionnan asa adam eńbek etip, kásipkerlik halyq úshin negizgi tabys kózderiniń birine ainalyp otyr.
«Halyqtyń tabysynyń mańyzdy kózi bolyp sanalatyn kásipkerlikti damytý – Memleket basshysynyń árdaiym erekshe nazarynda turǵan másele. Kásipkerlikti odan ári damytý úshin biznes júrgizý qaǵidalaryn jetildirip, ony barynsha túsinikti ári ashyq etý mańyzdy», – dedi Oljas Bektenov.
Premer-ministr Úkimettiń biznes-qaýymdastyqpen tyǵyz jumys istei otyryp, jańa salyq saiasatyn qalyptastyryp jatqanyn atap ótti. Sonyń aiasynda kásipkerlerge túsetin ákimshilik júkteme aitarlyqtai azaimaq.
Atap aitqanda, salyqtyq eseptilik 30%-ǵa, al salyqtar men alymdardyń sany 20%-ǵa qysqarady. Bul kásipkerlerdiń esep berýge ketetin ýaqytyn únemdep, óz isin damytýǵa kóbirek kóńil bólýine múmkindik beredi.
«Eseptilik pen biýrokratiianyń azaiýy kásipkerlerge biznesin keńeitýge naqty jaǵdai jasaidy», – dedi Úkimet basshysy.
Sonymen qatar jańa Biýdjet kodeksine sáikes, shaǵyn biznesten túsetin barlyq salyq túsimderi jergilikti ákimdikterdiń ieliginde qalady. Bul ózgeris óńirlerde kásipkerlikti damytýǵa tikelei yntalandyrý tetigi bolmaq.
«Endi ákimder árbir kásipkerdiń tabysty bolýyna múddeli bolady. Óitkeni shaǵyn biznestiń damýy jergilikti biýdjet kiristeriniń ósýine tikelei áser etedi», – dep túiindedi Oljas Bektenov.
Atalǵan bastamalar Prezidenttiń ekonomikany ártaraptandyrý, halyqtyń ál-aýqatyn arttyrý jáne kásipkerlikti el damýynyń negizgi tiregine ainaldyrý jónindegi tapsyrmalaryn iske asyrýǵa baǵyttalǵan.
