QR Joǵary Sot keńesi jańa mamandyrylǵan ákimshilik sottarǵa sýdialardy konkýrstyq irikteýdi qorytyndylady, dep habarlaidy "Ult aqparat".
«1 shildeden bastap elimizde ákimshilik protsedýralyq-protsessýaldyq kodeks kúshine enetini belgili. Osyǵan orai, oblystyq sottarda ákimshilik ister jónindegi mamandandyrylǵan sot alqalary quryldy. Al, oblys ortalyqtary men Qaskelen, Semei, Jezqazǵan jáne Ekibastuz qalalarynda 21 mamandandyrylǵan ákimshilik sot jańadan quryldy. Qazirgi ákimshilik sottar ákimshilik quqyq buzýshylyq jónindegi mamandandyrylǵan sottar bolyp ózgertiledi. Al jańadan qurylǵan ákimshilik sottarda memlekettik organdar men azamattar arasyndaǵy daýlar qarastyrylady», - dep habarlady QR Joǵary Sot keńesiniń apparaty.
Joǵary Sot keńesi jańa sottardy kadrlarmen qamtamasyz etýge baǵyttalǵan konkýrsty aiaqtap úlgerdi. Atap aitqanda, oblystyq sottaǵy alqalardyń 17 tóraǵasy, aýdandyq sottardyń 21 tóraǵasy jáne 78 sýdiasy qyzmetine kandidattar irikteldi.
«Bul laýazymdarǵa qyzyǵýshylyq óte joǵary boldy. Mysaly, oblystyq sottaǵy alqa tóraǵasynyń 17 bos laýazymyna barlyǵy 91 adam qujat tapsyrǵan. Aýdandyq sot tóraǵasynyń 21 bos laýazymy konkýrsyna 89 úmitker qatysty. Aýdandyq sot sýdiasynyń 78 bos laýazymyna – 279 adam. Onyń ishinde, 129 adam Nur-Sultan men Almaty qalalarynda qurylǵan jańa mamandandyrylǵan ákimshilik sottarǵa ornalasýǵa niet bildirgen. Al Qyzylorda oblysyndaǵy jańa mamandandyrylǵan aýdanaralyq sotqa bar joǵy 16 adam qujat tapsyrdy», - deidi Joǵary Sot.
Keibir laýazymdarǵa jariialanǵan konkýrs, úmitkerler bola tura, júzege asqan joq dep tanyldy. Sebebi laiyqty talapker bolmaǵan.
Konkýrstyq irikteý nátijesinde Joǵary Sot keńesi kelesi laýazymdarǵa úmitkerlerdi iriktedi:
Oblystyq sottaǵy alqa tóraǵasy laýazymyna - 16 úmitker;
Aýdandyq sot tóraǵasy laýazymyna - 18 úmitker;
Aýdandyq sot sýdiasy laýazymyna - 60 úmitker.
Iriktelip alynǵan 94 tulǵanyń 48-zi er adamdar, 46-sy áielder. Talapkerlerdiń 11-i tuńǵysh ret sýdia laýazymyna usynylyp otyr. Atalǵan konkýrs sheńberinde 27 adam joǵary turǵan laýazymdarǵa usynyldy.
Bos sýdia laýazymdaryna usynylǵan tulǵalardyń tolyq tizimi, jáne konkýrsqa qatysty basqa da aqparat Joǵary Sot keńesiniń resmi saitynda jariialanatyn bolady.
