Qazaqstanda mektepter 2021 jyldan bastap on eki jyldyq bilim berý júiesine kóshedi. Bul jaiynda bilim jáne ǵylym ministri Ashat Aimaǵambetov habarlaǵan bolatyn. Bilim berý júiesiniń jańa formatyna kóshý qalai júzege asyrylady jáne on eki jyldyq bilim berý júiesine sai oqýshy mektepti neshe jasynda bitiretinin taldap kóreiik. Bul týraly «Ult» portaly habarlaidy.
Eń aldymen Qazaqstandaǵy mekterdiń on eki jyldyq bilim berý formatyna kóshýi ministrliktiń 2020-2025 jyldarǵa arnalǵan bilim berý men ǵylymdy damytýdyń memlekettik baǵdarlamasynyń jobasyna engenin aita ketken jón. Al 12 jyldyq júiege kóshý kezeń-kezeńimen 2021 jyly jańartylǵan bilim berý mazmuny tolyqtai engizilgen soń júzege asady. Al bilim salasyndaǵy jańartylǵan baǵdarlamalar 2015 jyly bekitildi. Soǵan sáikes, qazir barlyq synyptyń 95 paiyzy derlik jańartylǵan mazmunǵa kóshti. 2020 jyly 11-synyptar da jańartylǵan baǵdarlamaǵa aýysady dep josparlanǵan bolatyn.
Dei turǵanmen, ministr asyǵystyq tanytsaq, jaǵdaidyń ýshyǵyp ketýi múmkin ekenin aitty. Sebebi bul júie bilim júiesine kóshý mektepterdiń infraqurylymyna úlken salmaq salady. Sonymen qatar ustazdardy daiarlaý men jańa oqýlyqtardy shyǵarý da qajet. Taǵy bir ózekti másele – Qazaqstanda úsh aýysymmen jumys isteitin mektepterdiń qarasy kóp ekeni.
Iaǵni, on eki jyldyq bilim berý júiesi 1-11 synyptar jańartylǵan mazmundaǵy baǵdarlama men jańa baǵalaý júiesine tolyǵymen kóshkennen keiin engiziledi.
Oqýdyń jańa júiesine aýysý úshin 2016 jyldan bastap 1, 2, 3, 5, 6, 7 jáne 8-synyptarda orta bilim berýdiń jańartylǵan mazmuny engizildi. Bul júie Nazarbaev ziiatkerlik mektebiniń tájiribesi negizinde qurastyrylǵan bolatyn.
2019-2020 oqý jylynda bul qatarǵa 4, 9 jáne 10-synyp oqýshylary da qosyldy, al mekteptiń bitirýshi túlekteri úshin bilim berýdiń jańa mazmuny 2020-2021 oqý jylynda engiziledi.
Bul júiege kóshken soń mektepterdegi bastaýysh synyptardyń oqý merziim bir jylǵa uzartylady. Buǵan deiin 1-4 synyp bastaýysh dep atalsa, endi oqýshylar 1-5 synypta bastaýyshta bilim alady. Negizgi orta jáne jalpy orta bilim berý merzimi ózgermeidi.
Qoryta aitqanda, bul júie 2021-2022 oqý jylynan bastap kóshiriledi. Al baǵdarlama bekitilgennen keiin oqý jospary men memlekettik jalpyǵa mindetti bilim berý standartyna ózgeris engiziledi.
Ministrdiń aitýynsha, bul júiege kóshken kezde oqýshylar aitarlyqtai ózgeristi sezbeidi. Sebebi qazir tórtinshi synyp oqyp júrgen oqýshylar birinshi synyptan beri jańartylǵan baǵdarlama negizinde bilim alyp jatyr. Sonymen qatar endi 10-synyp oqýshylarynyń oqý baǵdarlamasyna "Kásipkerlik jáne biznes negizderi" páni qosylady. Ministrlik bul pándi qosý arqyly oqýshylardyń mamandyq tańdaýynda qatelik jibermeýi úshin qajet ekenin aityp otyr.
Sonymen qatar on eki jyldyq bilim berý júiesine kóshkennen keiin balalar alty jastan bastap mektepke qabyldanady. Osy oraida eger bala alty jasynda mektepke baratyn bolsa, on eki jyl oqyp shyqqan kezde 18 jasta bolady, al 18 jastaǵy bala áskerge shaqyrylatyny da kóterilgen bolatyn. Alaida zańǵa sáikes, Qazaqstanda balalar tolyq alty jasqa tolǵan soń mektepke barady. Qazirdiń ózinde baladardyń 80%-y mektepke alty jastan bastap barady. Sonymen qatar bul kórsetkish jyl saiyn artyp jatyr. Demek, 6 jasta mektepke barǵan bala 12 jyldyq mektepti on jeti jasynda bitirip shyǵady. Jeti jastan mektepke baryp, on bir jyl oqyǵandar da dál solai, sondyqtan bul jaǵynan esh ózgeris joq, dep aitty Aimaǵambetov.
Demek, 17 jasynda mektep bitirgen túlek joǵary oqý ornyna tússe, ásker qataryna keiinirek shaqyrylady.
