2020 jyly internettegi 73 myń destrýktivti material buǵattaldy. Bul týraly halyqqa esep berý kezdesýinde QR Aqparat jáne qoǵamdyq damý ministri Aida Balaeva aitty, dep habarlaidy "Ult aqparat".
«Ulttyń jany men sanasyna nár beretin úlken faktorlardyń biri bul – árine, din salasy. Biz – kóp konfessiialy memleketpiz. Elimizde 18 dini baǵytta 3 848 birlestik resmi tirkelgen. Mine, ministrlik óz quzyreti sheginde olardyń árbirimen tyǵyz jumys istep keledi. Dese de, halqymyzda: «Din – ustai alsań qasietiń, ustai almasań – qasiretiń» degen sóz bar. Onyń shynaiy mánin biz, ásirese, jastarǵa jetkizýge tyrysamyz. Bul rette, negizgi úsh baǵytty atap ótýge bolady. Birinshi – internettegi dini ekstremizm ideologiiasyna qarsy kúres, ekinshi – naqty maqsatty toptarmen aqparattyq-túsindirý júrgizý, úshinshi – jat dini aǵym qurbandaryn ońaltý jumystary», - dedi ministr.
Aida Balaeva radikaldy dini aǵymdar ideologiiasy negizinen internet resýrstar arqyly taralatynyn atap ótti.
«Bul rette, ekstremistik dini aqparattyń aldyn alý maqsatynda internet jelilerine udaiy monitoring júrgiziledi. Byltyr osyndai 73 myń destrýktivti material buǵattalyp, BAQ men áleýmettik jeli arqyly 80 myńnan astam dini aǵartý jumysy jariialandy», - dedi ol.
Onyń atap ótýinshe, halyqqa sapaly dini aqparat berý maqsatynda búginde 229 túsindirý-nasihat toby jumys isteidi.
«Joǵary saýatty, kásibi sarapshylardan turatyn úgit-nasihat toby 1,5 million halyqty qamtyǵan 16 myńnan astam naqty aǵartý is-sharalaryn júrgizdi. Ásirese radikaldy dini aǵymdar yqpalyna túsý qaýpi joǵary naqty maqsatty toptarmen jumysqa basa mán berildi», - dedi ol.
