Qazaqstanda aldaǵy úsh jylda 1971 jyldan bastap bekitilgen terminderge monitoring jasalady. Bul týraly Májilis depýtattarynyń saýalyna orai QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy "Ult aqparat".
«Terminologiia salasy memlekettik tildi damytýdyń basym baǵyttarynyń biri bolyp sanalady. Osy rette ulttyq terminologiialyq qordy tolyqtyrý boiynsha úzdiksiz jumys júrgizilip keledi. Táýelsizdik jyldary qazaq tiliniń terminologiialyq qory aitarlyqtai artyp, qazir ol 30 myńǵa jýyq termindi qamtidy. QR Úkimetiniń 1998 jylǵy 21 sáýirdegi № 367 qaýlysyna sáikes Terminologiia komissiiasy Qazaqstan Respýblikasy Úkimetiniń janyndaǵy barlyq salalarda qazaq tiliniń terminologiialyq leksikasy boiynsha usynystar ázirleitin konsýltatsiialyq-keńesshi organ bolyp tabylady», - dedi ol.
Onyń atap ótýinshe, komissiia bekitken terminderdiń jappai qoldanylýyn qamtamasyz etý maqsatynda Mádeniet jáne sport ministrligi múddeli memlekettik organdarmen birlesip, tiisti sharalar qabyldaidy. Birizdilikti qamtamasyz etý maqsatynda komissiia bekitken terminderdiń jinaǵy turaqty túrde barlyq memlekettik organdarǵa jumysta paidalaný úshin joldanady. Sonymen qatar bekitilgen terminder «termincom.kz» resmi saitynda, «Egemen Qazaqstan», «Ana tili» jáne «Túrkistan» respýblikalyq gazetterinde, áleýmettik jelilerde jariialanady.
«2020 jyly terminderdi paidalanýǵa qatysty arnaiy monitoring júrgizýdiń ádistemesi bekitildi. Onyń negizinde 2021-2023 jyldar aralyǵynda 1971 jyldan bastap bekitilgen terminderge monitoring jasalady. Nátijesinde bekitilgen terminologiialyq qor rettelip, kópshiliktiń nazaryna usynylady», - dedi Eraly Toǵjanov.
Úkimet basshysy orynbasarynyń aitýynsha, salalyq terminderdiń sapasyn qamtamasyz etý úshin ortalyq atqarýshy organdar janynan terminologiialyq jumys toptary qyzmet etedi. Bul baǵytta 2 jumysty jetildirý maqsatynda komissiianyń quramyna ártúrli sala mamandaryn tartý kózdelip otyr.
«Terminderdi bekitý isine azamattardyń qatysýyn qamtamasyz etý maqsatynda «termincom.kz» saitynda qaralýdaǵy terminderge daýys berý platformasy ashyldy. Saittyń qoldanýshylary komissiia músheleriniń usynystarymen tanysyp, óz pikirlerin bildire alady. Qoldanýshylardyń usynys-pikirleri terminderdi bekitý kezinde nazarǵa alynady. Komissiia otyrystaryn barynsha ashyq ótkizý úshin onyń kelesi otyrystaryna BAQ ókilderin shaqyrý josparlanyp otyr», - dedi ol.
