Qorǵanys isteri jónindegi departamentterinde, basqarmalary men bólimderinde 2022 jylǵy kóktemgi áskerge shaqyrý naýqany aldynda jastardy zerdeleý jumystary bastaldy. Áskerge 18-27 jas aralyǵyndaǵy azamattar shaqyrylady. Bul týraly QazAqparat Qorǵanys ministrligine silteme jasap habarlaidy.
Jeke isterdi zerdeleý ýaǵynda áskerge shaqyrylýshylardyń saýalnama derekteri anyqtalyp, árbir jas azamatpen jáne onyń ata-analarymen áńgimelesedi. Zerdeleý barysynda áskerge shaqyrylýshylardyń alǵan mamandyqtary mindetti túrde eskerilip, sonymen qosa olardyń moraldyq jáne iskerlik qasietteri, densaýlyq jaǵdaiy, dene bitimi, jalpy bilimi, arnaiy daiyndyǵy men otbasy jaǵdaiy jónindegi málimet naqtylanady.
Ákimshilik nemese qylmystyq jaýapkershilikke tartylǵan, tergeýde júrgen, zańsyz qoǵamdyq birlestikterdiń nemese dástúrli emes dini aǵymdardyń músheleri retinde arnaiy esepte turǵan adamdar basty nazarǵa alynady.
«Aldyn ala zerdeleý bastapqy kezeńde qandai da bir ásker túrleri men tekterinde áskeri qyzmet ótkerýge ázir jastardyń sapalyq quramyn anyqtaýǵa múmkindik beredi. Áskerge shaqyrýdan bosatý negizderiniń zańdylyqtary, onyń ishinde densaýlyq jaǵdaiy da tekseriledi. Bir kúnde shamamen 800-900 áskerge shaqyrylýshy keledi. Áskerge shaqyrý jasyndaǵy barlyǵy 90 myńnan astam jasóspirim zerdelenedi», — dedi Qarýly Kúshteri Bas shtaby Uiymdastyrý-jumyldyrý jumystary departamenti bastyǵynyń orynbasary polkovnik Aian Esliamov.
Jergilikti áskeri basqarý organdary Qazaqstan Respýblikasynyń Qarýly Kúshterine, Ulttyq qaýipsizdik komitetiniń Shekara qyzmetine, Memlekettik kúzet qyzmetine jáne Ulttyq ulanyna áskerge shaqyrýdy júzege asyrady. Biyl kóktemde shamamen 17 000 azamat áskerge shaqyrylady. Olardyń 6 500-den astamy Qarýly Kúshterdiń bólimderi men bólimshelerinde qyzmet etedi.
