QR Bilim jáne ǵylym ministrligi jańa oqý jylynda arnaiy bilim berý uiymdarynyń qalai jumys isteitinin túsindirdi, dep habarlaidy QazAqparat.
«Bizdiń arnaiy salada arnaiy mektepter, mektep-internattar, pedagogikalyq, meditsinalyq, psihologiialyq konsýltatsiialar, túzeý kabinetteri, ońaltý ortalyqtary syndy basqa da uiymdar bar. Osy uiymdardyń pandemiia kezindegi oqý protsesin uiymdastyrýdyń ádistemelik usynymdary ázirlendi. Atalǵan usynymdar bizde qoǵamdyq uiymdarmen, densaýlyq saqtaý salasynyń mamandarymen, arnaiy bilim berý salasynyń mamandarymen talqylandy. Shilde aiynda talqylanyp, tamyz keńesinde barlyq muǵalimderdiń qaraýynan ótti», - dedi QR BǴM Mektepke deiingi jáne orta bilim komitetiniń bas sarapshysy Ardaq Aitjanova Facebook paraqshasynda ótken onlain jinalysta.
Atalǵan ádistemelik usynystardy Túzetý pedagogikasy ulttyq ǵylymi-praktikalyq ortalyǵynyń direktory Raigúl Aitjanova tanystyrdy.
«Resmi statistika boiynsha elimizde 161 156 bala arnaiy bilimdi qajet etedi. Bul sanatqa kózi nashar kóretin jáne zaǵip balalar (elimiz boiynsha 8 318 bala), qulaǵy nashar estitin 5 911 bala, tirek-qimyl apparaty buzylǵan 18 841 bala, sóileý qabileti buzylǵan 47 022 bala, psihikalyq damýy tejelgen 50 826 bala, aýtizmmen aýyratyn 5 193 bala jáne aqyl-oi kemistigi bar 25 045 bala kiredi», - deidi maman.
Respýblika boiynsha 420 arnaiy bilim berý uiymy jumys isteidi. Onyń ishinde 195 psihologiialyq-pedagogikalyq túzetý kabineti, 98 arnaiy mektep, 14 ońaltý ortalyǵy jáne 38 arnaiy mektepke deiingi uiym, 75 psihologiialyq-meditsinalyq-pedagogikalyq konsýltatsiia (PMPK) jumys isteidi.
Jańa 2020-2021 oqý jylynda arnaiy bilim berý uiymdaryna qashyqtan, shtattyq jáne jabyq rejimde jumys isteý usynylyp otyr.
«Elde qatań karantin rejimi ornasa, arnaiy bilim berý uiymdarynda qashyqtan oqytý formaty usynylady. Arnaiy balabaqshalar jumysyn óńirdegi bas sanitarlyq dáriger sheshimimen jalpy tiptegi balabaqshalar sekildi kezekshi toptardy uiymdastyrý arqyly jalǵastyrýǵa bolady. Psihologiialyq-meditsinalyq-pedagogikalyq konsýltatsiialar, psihologiialyq-pedagogikalyq túzetý kabinetteri jáne ońaltý ortalyqtary shtattyq rejimde qashyqtyq tehnologiialardy qoldaný arqyly jumys isteidi. Al jabyq rejim óńirdegi bas sanitarlyq dáriger sheshimimen arnaiy mektep-internattarǵa engiziledi. Jabyq rejim aqyl-oi kemistigi bar balalardy oqytýǵa usynylady, óitkeni olar qashyqtan jiberilgen materialdy qabyldai almaidy», - dep túsindirdi Raigúl Aitjanova.
QR BǴM habarlaýynsha, arnaiy bilim berý uiymdary oqytý formatyn ata-analarmen kelise otyryp, ózderi tańdaidy.
