Ótken táýlikte Qazaqstanda koronavirýs derti laboratoriiada dáleldengen 1 370 naýqas tirkeldi. Bul jóninde densaýlyq saqtaý ministrliginiń resmi saity habarlady. Mekeme málimeti boiynsha, 28 qańtarda simptomdary Covid-qa uqsas "pnevmoniiamen" aýyrǵan 70 adam sanaqqa alynǵan. Jumada koronavirýstan 8 adam kóz jumsa, beisenbide "kovidqa uqsas pnevmoniiadan" 2 kisi qaitys bolǵan.
Ministrlik "koronavirýsqa uqsas pnevmoniia" statistikasyn bir kún keshiktirip jariialaidy. Onyń ústine, mekeme bul dertke shaldyqqandardyń aimaqtar boiynsha málimetin bermeidi, tek respýblikadaǵy jalpy kórsetkishpen shekteledi.
Sońǵy táýlikte koronavirýs infektsiiasynan 1452 naýqas jazylyp shyqqan.
Covid-ti jańa juqtyrǵandar kórsetkishi boiynsha Pavlodar oblysy alda keledi. Munda bir táýlikte bul infektsiiamen 267 adam tirkelgen. Juma kúni aimaqtyń bas sanitar dárigeri munda indettiń órshýine bailanysty birneshe aýdanda kemi eki aptaǵa 20 sanitarlyq post qoiylatynyn málimdedi. Jyl basynan beri óńirde koronavirýs juqtyrǵan 4 myńdai adam tirkelgen.
Sońǵy málimet boiynsha indet eń jyldam tarap jatqan "qyzyl aimaqqa" kirgen Nur-Sultanda - 139, Almatyda – 90 adam koronavirýs juqtyrǵan.
Ótken táýlikte naýqas eń kóp tirkelgen aimaqtar — Aqmola (205 adam) jáne Pavlodar (267 adam) oblystary.
Soltústik Qazaqstanda — 115, Qostanaida — 110, Batys Qazaqstanda — 91, Almaty oblysynda — 83, Qaraǵandy oblysynda — 81, ShQO — 67, Atyraý oblysynda — 31, Jambyl oblysynda — 27, Túrkistan oblysynda — 19, Shymkent qalasynda — 17, Qyzylorda jáne Mańǵystaý oblystarynda — 11 adamnan, Aqtóbe oblysynda — 6 adam Covid juqtyryp, tirkeýge alyndy.
Byltyrǵy naýryzdan bergi málimet boiynsha, Qazaqstanda jalpy 185 369 adam koronavirýspen, 47 787 adam soǵan uqsas pnevmoniiamen esepke alynǵan. 3 101 adam kóz jumǵan. Kei áleýmettanýshylar men meditsina qyzmetkerleriniń aitýynsha, koronavirýspen aýyrǵandar sany budan áldeqaida kóp bolýy múmkin.
Resmi málimet boiynsha, osy kúni koronavirýs infektsiiasy dáleldengen, dáleldenbegen adamdardy qosa eseptegende 27 403 adam emdelip jatyr. Olardyń ishinde 6 430 kisi statsionarda. 265 adamnyń jaǵdaiy aýyr, 61 patsienttiń jaǵdaiy óte aýyr, 43 naýqas jasandy tynys apparatyna qosylǵan.
