Qazaqstanda 2018 jyly 12 myńnan astam adam túrmeden bosap shyqty, dep habarlaidy "Ult aqparat" QR Ishki ister ministrligi Qylmystyq-atqarý júiesi komitetiniń baspasóz qyzmetine silteme jasap.
Atap ótilgendei, Qazaqstanda sońǵy jyldary qylmystyq-atqarý júiesin izgilendirýge baǵyttalǵan birqatar quqyqtyq norma qabyldandy. Maqsat - sottalǵandardy erterek bosatýǵa múmkindik berý.
«2018 jyldyń 12 aiynyń ishinde penitentsiarlyq júie mekemelerinen 12 myńǵa jýyq adam bosatyldy. Onyń ishinde, eki myńnan astamynda jazany óteý merzimi aiaqtalǵan. Al qalǵany - merziminen buryn shartty túrde bosatyldy, jeńildetilgen jaza túrine aýystyryldy nemese basqa aspektilerge ie boldy», - delingen komitettiń habarlamasynda.
Bul rette, arnaiy kontingentpen QR Prezidentiniń Jarlyǵymen bekitilgen Túrmeden bosatylǵan jáne probatsiia qyzmetinde tirkelgen azamattardy áleýmettik ońaltýdyń 2017-2019 jyldarǵa arnalǵan keshendi strategiiasy aiasynda tiisti jumystar atqarylýda. Mysaly, 164/3 mekemesi (ortasha qaýipsizdik, Petropavl q, SQO) basshysynyń orynbasary Rústem Rahmetovtyń aitýynsha, byltyr koloniiadan 317 adam bosatylǵan. Olardyń 74-i ǵana jaza merziminiń aiaqtalýyna bailanysty erkindikke shyqqan. Qalǵany - merziminen buryn shartty túrde bosatylǵan nemese jeńildetilgen jaza túrine aýystyrylǵan.
«Osy sanattaǵy adamdardy qaita áleýmettendirý sheńberinde onnan astam adam beiimdeý ortalyǵyna ornalastyryldy. Taǵy ekeýine zeinetaqy jáne múgedektikti alýǵa qatysty kómek kórsetildi», - deidi Rústem Rahmetov.
