QR Aýyl sharýashylyǵy birinshi vitse-ministri Aidarbek Saparov Qazaqstanda qansha un qory saqtalǵanyn aitty, dep habarlaidy QazAqparat.
«7 sáýirdegi jaǵdai boiynsha eldegi un qory 118 myń tonnaǵa jetedi, onyń ishinde: turaqtandyrý qorlarynda - 10,4 myń tonna, «ainalym shemasy» aiasynda – 22 myń tonna, óndirýshilerde – 48,6 myń tonna, qoimalarda – shamamen 20 myń tonna jáne saýda obektilerinde – 18 myń tonna bar. Atalǵan kólem ishki qajettilikti qamtamasyz etýge tolyq jetkilikti», - dedi A. Saparov ortalyq kommýnikatsiialar qyzmetinde ótken baspasóz máslihatynda.
Sonymen birge, Azyq-túlik korporatsiiasy resýrstarynda 800 myń tonnadan astam astyq bar, olar qajet bolsa jaǵdaidy turaqtandyrý úshin ishki naryqqa jiberiledi.
«Qańtar aiynda óńirlerge áleýmettik nan úshin bidaidy arzandatylǵan baǵamen – 90 myń teńgege satý jóninde sheshim qabyldanǵan edi. Alaida qańtar-aqpan ailarynda esh suranys bolǵan joq. Tek naýryz aiynan bastap ótinimder túsip jatyr», - dedi Aidarbek Saparov.
Buǵan deiin Astyq óńdeýshiler odaǵy elimizde bir jarym aptaǵa ǵana jeterlik bidai qory qalǵanyn málimdegen edi. Astyq ósirýshiler men óńdeýshiler bidaidy bólise almai daý týǵany, bidai taýsylsa barlyq diirmender jumysyn toqtatýǵa májbúr ekeni aitylǵan.
Óz kezeginde Aidarbek Saparov elde eshqandai astyq tapshylyǵy joq ekeninhabarlady. 1 sáýirdegi jaǵdai boiynsha respýblikada 6,4 mln tonna astyq bolǵan.
Ishki naryqta tapshylyq týdyrmaý úshin jáne un tartatyn kásiporyndarǵa júktemeni azaitý maqsatynda Syrtqy saýda saiasaty jáne halyqaralyq ekonomikalyq uiymdarǵa qatysý máseleleri jónindegi vedomstvoaralyq komissiia 15 sáýir men 15 maýsym aralyǵynda bidai men un eksportyn kvotalaý sheshimin qabyldady.
Bidai kvotasynyń kólemi – 1 mln tonna, un – 300 myń tonna.
