Biyl 59 eldi mekenge gaz beriledi. Bul týraly QR Energetika ministri Bolat Aqsholaqov aitty, dep habarlaidy QazAqparat.
«2021 jyly gaz óndirý kólemi 53,8 mlrd tekshe metrdi qurady. Al 2022 jylǵa arnalǵan jospar – 54,5 mlrd tekshe metr. 29,4 mlrd tekshe metr taýarlyq gaz óndirildi, 2022 jylǵa jospar – 29,6 mlrd tekshe metr. Gaz eksporty - 7,2 mlrd tekshe metr, 2022 jylǵa arnalǵan gaz eksportynyń kútiletin kólemi – 5,4 mlrd tekshe metr. Eksporttyń tómendeýi ishki tutynýdyń artýymen bailanysty», - dedi ol ministrliktiń keńeitilgen alqa otyrysynda.
Ministrdiń atap ótýinshe, 2022 jylǵy 1 qańtardaǵy jaǵdai boiynsha eldi gazdandyrý 57,7 paiyz nemese 11 mln adam gazǵa qol jetkizdi.
«Óńirlerdi damytýǵa arnalǵan transfertter aiasynda osy jyly 45,8 mlrd teńge somasyna gaz infraqurylymy qurylysynyń 96 jobasyn iske asyrý josparlanýda, onyń ishinde 59 eldi mekendi nemese 79 myń adamdy gazben qamtamasyz etý úshin 38 nysandy aiaqtaý josparlanǵan», - dedi Bolat Aqsholaqov.
