Premer-ministrdiń orynbasary Berdibek Saparbaev zeinetaqy jinaǵyn paidalaný boiynsha qandai usynystar ázirlengenin aityp berdi, dep habarlaidy Sputnik Qazaqstan.
"Prezidenttiń tapsyrmasy boiynsha Úkimettiń janynan arnaiy jumys toby qurylǵan bolatyn. Oǵan tanymal ǵalymdar men sarapshylar endi. Biz halyqaralyq tájiribeni zerdelep shyqtyq. Sóitip, Prezident Ákimshiligine zeinetaqy jinaǵyn paidalaný boiynsha birneshe usynys engizdik", - dedi Saparbaev astanada ótken baspasóz máslihatynda.
Onyń sózine qaraǵanda, birinshi usynys zeinetaqy jinaǵyn baspana alý úshin paidalanýǵa arnalǵan. Ekinshisi – salymnyń belgili bir bóligin em-domǵa jumsaý. Oǵan tegin meditsinalyq qyzmet pen mindetti áleýmettik meditsinalyq saqtandyrýǵa kirmeitin emdeý sharalary jatady.
"Osy usynystar Prezident Ákimshiliginiń qaraýyna engizildi. Ázirshe, naqty sheshim qabyldanǵan joq. Sheshim shyqqanda barlyǵyna jetkizemiz", - dep túsindirdi Saparbaev.
Osy oraida vitse-premer zeinetaqy jinaǵyn paidalanýǵa qatysty negizgi máseleni atap ótti.
"Men taǵy qaitalap aitamyn, qazaqstandyqtar tiisti zeinetaqysyn alýy qajet. Sondyqtan zeinetaqy jinaǵyn paidalaný jaǵy esepshottaǵy aqshanyń kólemine bailanysty bolady. Adam zeinetkerlikke shyqqanda qajetti aqshamen qamtylýy shart", - deidi Saparbaev.
Vitse-premerdiń dereginshe, búginde qazaqstandyqtardyń ortasha ómir súrý uzaqtyǵy 73 jasty quraidy. Osyǵan bailanysty zeinetaqy aqshasy naqty qansha jylǵa qajet bolatynyna da zertteý júrgizilgen.
"Biz tiisti esep-qisapty jasap shyqtyq. Qazaqstandyqtar, shamamen, zeinetke shyqqannan keiin shamamen 19-25 jyl ómir súredi. Sondyqtan biz árbir adamnyń esepshotyndaǵy qarjy zeinet jasyna jete me, joq pa, osyny eskerýimiz kerek. Ókinishke qarai, qazirgi kezde salymshylardyń jartysynyń jinaq somasy 1 million teńgege jetpeidi. Al qajetti soma, shamamen, 10-12 million teńge bolýy tiis. Ondai azamattardyń sany – 102 myń adam", - dedi Saparbaev.
